De Biasi ka një këshillë “urdhëruese” për Manajn

Trajneri i kombëtares shqiptare Gianni De Biasi dha një intervistë për “Repubblica Tv”, gjatë qëndrimit në Koverçano, ku u vlerësua me çmimin “Stoli i Artë”.

Tekniku kuqezi ka komentuar dy talentet shqiptare të Serisë A, Rai Manajn dhe Elsid Hysajn. Për herë të parë De Biasi jep një këshillë gati urdhëruese për Manajn.

“Një të ardhme larg Interit?”, ka thënë timonieri italian me pasaportë shqiptare. “Do të ishte e dëshirueshme, pasi besoj se nëse edhe sezonin e ardhshëm do të qëndrojë me zikaltrit, do të duhet të bëjë pjesë në ndonjë projekt. Nuk dua të fus hundët në punët e Interit, por besoj se një futbollist i ri ka nevojë të vihet në provë çdo të diel. Mendoj se për procesin e tij të rritjes, është thelbësore kjo gjë. Nëna natyrë i ka dhuruar të gjithë talentin. Ka personalitet të lartë, ndërkohë që ka vendosur edhe një rekord, duke shënuar vetëm 10 sekonda pasi ka debutuar me Kombëtaren. Është një lojtar që e njeh portën, ka forcën fizike, është i ri dhe besoj se e ardhmja është në favorin e tij. E rëndësishme është që ai të dijë ta menaxhojë si duhet”, tha De Biasi, transmeton Koha.net

Sa i takon mbrojtësit të Napolit, Elseid Hysaj, njëherësh dhe futbollisti shqiptar më i shtrenjtë në histori, De Biasi deklaroi se “Hysaj për mua është një lojtar që ka cilësi të mëdha, teknike dhe fizike. Një lojtar me një personalitet të madh, të cilin e kam aktivizuar që 18 vjeç në Oslo, kur po fitonim 1-0. Një futbollist që te Napoli ka pasur një proces në rritje, kujtojmë që s’ka mbushur ende 22-vjeç. Të luajturit nën një presion të madh sikurse në ambientin te Napoli, do ta ndihmojë në vazhdimësi”.