Ajeti vazhdon të shkëlqejë me Frosinonen

Frosinone e ka marrë një tjetër fitore mjaft të rëndësishme në fushën e vet, duke mposhtur sot pasdite Udinesen me rezultat 2-0.

Suksesi vlen shumëfish për skuadrën debutuese, që tashmë është ngjitur në kupton e 26 pikëve dhe ka mposhtur një rival direkt, përveçse ka përfituar nga gabimet e disa skuadrave të tjera.

Për pasojë, tashmë mbijetesa nuk është e pamundur, sepse Palermo ka vetëm një pikë më shumë, por edhe Atalanta e Udinese nuk janë larg.

Si zakonisht, qendërmbrojtësi i kombëtares sonë Arlind Ajeti luajti 90 minuta, duke zhvilluar një ndeshje shumë pozitive dhe duke konfirmuar se është një mbrojtës mjaft i rëndësishëm për këtë skuadër, që është përmirësuar ndjeshëm në vitin e ri, transmeton Sportal.al

Në fund, mediat italiane kanë vlerësuar paraqitjen e Ajetit, duke i vënë notën 7 (TuttoMercatoWeb.it) apo 6.5 në site të tjera, ndërkohë që është vënë theksi tek soliditeti mbrojtës i Frosinones në tërësi dhe te aftësia e Ajetit për të kuptuar e ndërhyrë shumë shpejt në situata të rrezikshme.