Sallaj nga Juniku: Puna në turizëm çdo ditë është e ndryshme

Blerina Sallaj, 27vjeçare, i bashkon gjenerata dhe nacionalitete të ndryshme për aktivitete të përbashkëta përmes Qendrës Rajonale të Turizmit në Junik, ku ajo punon. Për tri vite me radhë ajo i bashkërendon aktivitetet turistike dhe kulturore, si ekskursione të trashëgimisë kulturore dhe kampingje për të rinjtë.

Përveç kësaj, ajo bashkëpunon me organizata të ndryshme, si me shoqatat e ecjeve nëpër bjeshkë dhe me OJQ-të për fuqizimin e femrave për të punuar në fushën e ushqimit tradicional, kostumeve  tradicionale dhe të punimeve të dorës. Numri i turistëve rritet çdo vit – vetëm vitin e kaluar në Junik kanë ardhur 8000 deri 10000 turistë.

Kjo është arsyeja pse Blerina po ashtu është përgjegjëse për zhvillimin e strategjive dhe ideve të reja për sektorin e turizmit në Kosovë, dhe punon me komuna të ndryshme.

Njohuritë e gjuhës gjermane dhe kreativiteti i saj i kanë ndihmuar Blerinës që të punojë në fushën e turizmit dhe e kanë bindur kryetarin e Junikut që ajo është personi i duhur për atë pozitë. Pesë vite më parë, asaj i kujtohet se si njerëzit në Junik nuk ishin mësuar t’i shihnin femrat aktive dhe të angazhuara në turizëm.

Por sot ajo është e lumtur që shumë femra janë të interesuara për këtë sektor, dhe se tani shumë e më shumë femra po vijojnë studime universitare në fushën e turizmit.

Turizmi po ashtu e ka ndryshuar kulturën në qytet, ku shumë e më shumë qytetarë të Junikut e kuptojnë se ai ndihmon në gjenerimin e të ardhurave. Blerina ka mësuar se turistët janë të interesuar që ta njohin kulturën e vendit dhe ushqimet tradicionale. Për këtë arsye ajo mendon se turizmi është sektor i mirë për punësimin e femrave, për krijimin e kontakteve me klientët dhe për t’ua treguar atyre mënyrën e jetës dhe traditat.

Ajo i përdorë këto aspekte në punën e saj: Për fuqizimin e zhvillimit të bizneseve të vogla turistike në Junik, ajo është e angazhuar për t’i bindur familjet që të themelojnë vende për akomodim privat duke u bërë nikoqirë të turistëve nëpër shtëpitë apo kullat e veta.

Sot, qytetarët e Junikut e kanë kuptuar se turizmi është mënyrë për rritjen e të ardhurave të tyre, dhe ata e pyesin Blerinën se si t’i hapin dhe promovojnë vendet e tyre për akomodime private.

“Gjëja më e mirë të punosh me turizëm është se çdo  ditë është e ndryshme – as edhe dy ditë, as edhe dy aktivitete, nuk janë të njëjta. Nganjëherë puna nuk është e lehtë, meqë duhet bërë shumë gjëra për t’i bërë turistët e lumtur. Por në fund të ditës, buzëqeshja në fytyrën e turistit të bën shumë të lumtur”. (Kjo intervistë është realizuar në kuadër të aktivitetit “Gratë afariste në Kosovë – Ndërlidhja e popullatës vendore me prodhimet vendore” nga projekti COSiRA- Deutsche Gesellschaft fur Internationale Zusammenarbeit (GIZ) Kosovë). /Telegrafi/