“Jashtëtokësorët ndoshta shfrytëzojnë robotë inteligjentë”

Astronomi Seth Shostak, i cili punon në projektin SETI (Shërbimi për hulumtimin e inteligjencës jashtëtokësore) në Kaliforni, ka thënë se gjatë gjurmimit të jashtëtokësorëve duhet shqyrtuar edhe mundësia se është e mundur që qeniet jashtëtokësore veprojnë nëpërmjet robotëve të ndjeshëm.

Shostak mendon se njerëzit kanë shanse më të mëdha të marrin sinjale nga robotët të cilët i përdorin jashtëtokësorët, sesa sinjalet e formës biologjike.

Astronomi i njohur tha se gjurmimi i deritashëm i jashtëtokësorëve është bazuar kryesisht në rregullin standard të biokimisë, respektivisht ka qenë e bazuar në supozimin se krijesat jashtëtokësore janë të gjalla. Megjithatë, ai mendon se astronomët ndoshta kanë parë ekzistencën e “makinave të gjalla” në hapësirë.

Shkencëtari, në tekstin të cilin e publikoi revista Acta Astronautica tha se evolucioni mund të zgjasë dhe nevojitet shumë kohë që të vijë deri tek komunikimi ndërplanetar, por teknologjia zhvillohet shumë më shpejtë dhe është e mjaftueshme që vetë teknologjia të takojë llojin të cilin edhe e ka zhvilluar, shkruan Daily Telegraph.

Shostak tha se nëse shikojmë periudhën kohore që kemi lënë pas vetes, do të shohim se në një moment kemi shpikur radion, ndërsa në momentin tjetër kemi pasur të gjitha aparatet teknike për të shëtitur nëpër hapësirë. Mu ky zhvillim i teknologjisë dëshmon se jemi të aftë të zhvillojmë makina inteligjente, thotë shkencëtari. /Telegrafi/