Zyrtare: Peja në Ligën Ballkanike

Eurohold Balkan League ka konfirmuar në faqen zyrtare se kampioni i Kosovës në basketboll, KB Peja, do të jetë pjesë e garave të kampionatit të klubeve basketobllistike ballkanike për sezonin 2013/2014.

Kampioni i Kosovës, bëhet klubi i nëntë që i bashkohet EUROHOLD Ballkan League për sezonin 2013/2014.

“Verdhezinjtë bënë një kërkesë zyrtare për të marrë pjesë në këtë garë, pasi rivali i tyre, Sigal Prishtina, u pranuan muajin e kaluar. Pasi i dëshmuan ligës se ata do të kenë një buxhet të mirë dhe stabile, gjithashtu edhe kushte të mira e organizim të mirë, drejtori sportiv, Shay Shtriks së bashku me Assen Christov, që është drejtori ekzekutiv i kësaj lige, morën vendimin që t’i japin leje KB Pejës që të jenë pjesë e këtij kompeticioni me kushtet e njëjta me Sigal Prishtinën”, shkruan në komunikatën e faqes zyrtare të BIBL-së.

“Të shtunën, me 17 gusht, do të ketë një takim me presidentit të KB Pejës dhe përfaqësuesit tjerë të klubit ku të gjitha detajet tjera do të diskutohen. Pastaj, menaxheri i këtij kompeticioni, Kamen Toshev, do t’i bëjë një vizitë qytetit të Pejës, në mënyrë që të sigurohet se hoteli dhe kushtet e stërvitjeve janë të aranzhuara në mënyrën e duhur”, shkruan më tej në komunikatë.

Tani mbetet të shihet se a do t’i ndajë Ministria e Kulturës, Rinisë dhe Sportit, 35 mijë euro edhe për klubin e Pejës, ashtu siç i ndau për Sigal Prishtinën me 14 qershor. /Telegrafi/