Volkswagen do t’u ofrojë para klientëve

Në një faqe të njohur interneti për automobilat, thuhet se kompania gjermane e prodhimit të automjeteve, Volkswagen, po përgatitet t’u ofrojë pagesa në para kesh amerikanëve që kanë makina me naftë të kësaj firme. Këto makina u provua se ishin programuar qëllimisht që të jepnin të dhëna të rreme gjatë testeve për çlirimin e gazeve.

Në blogun “The Truth About Cars” (E vërteta mbi makinat), thuhet se pritet që Volkswagen-i ta njoftojë këtë vendim në ditët e ardhshme. Vetë kompania nuk ka komentuar publikisht lidhur me pagesat në kesh për konsumatorët, transmeton VOA.

Në raport thuhet gjithashtu se Volkswagen-i do të fillojë në shkurt të kryejë rregullimet e para të 482 mijë makinave me naftë që janë shitur në Shtetet e Bashkuara, të cilat kanë programin e dyshuar në motorin e tyre.

Kompania Volkswagen, po përballet me aktpadi të klientëve të irrituar, të cilët kërkojnë kompensim për rënien e vlerës së shitjes së makinave të përdorura Volkswagen and Audi, që përmbajnë programin e paligjshëm. Ky program ka dhënë të dhëna të rreme për çlirimin e gazeve nga makinat.