Vetëvendosja në folenë e vet

Nuk mund ta kesh shtetin nëse nuk e ke qytetari. Qytetari i Kosovës sot, mungon. Ai/ajo vazhdimisht mbetet duke u sorollatur poshtë e lartë, pa synim, pa qëllim, pa orientim, pa busull. Qytetari i Kosovës sot ka nevojë të dijë që jeta zhvillohet përtej pasurisë materiale. Qytetari i Kosovës duhet të jetë i vëmendshëm që ky shtet u takon të gjithë qytetarëve të saj e jo vetëm politikanëve dhe familjeve të tyre që përfitojnë nga tenderët, punësimet dhe përfitimet tjera të vjela nga buxheti i Kosovës dhe sistemi qeverisës. Jeta zhvillohet përtej një veture, një banese a shtëpie dhe nja 2-3 ari truall.

Kjo lloj, nëse doni, ideologjie ka munguar dhe vazhdon të mungojë në Kosovë. Për disa, jeta është kthyer në biznes, në marrëdhënie biznesi. Bile, askush as nuk të ofrohet as fizikisht nëse e di që nuk ka ndonjë përfitim material ose nuk të sheh si investim. Sot është vështirë ta bindësh qytetarin që kjo situatë politike në Kosovë, ose ky projekt politik, është i dëmshëm, se kjo qasje ta han dheun nën këmbë.

Lëvizja Vetëvendosje, si nismë qytetare, duhet të jetë mënyrë dhe formë që qytetari t’i kthehet jetës normale. Vetëvendosje tashmë e ka bindur qytetarin dhe qytetaren e Kosovës që kjo situatë politike në Kosovë, ose ky projekt politik, është i ndërrueshëm. Qytetarit të Kosovës duhet t’i kthehet shpresa, duhet t’i kthehet jeta, duhet t’i kthehet Kosova. Sepse Kosova është e krejt qytetarëve të vet, se në të kemi hise të gjithë, se Kosova nuk është vetëm pronë e politikanëve dhe e familjeve të tyre. Dhe ky është themeli dhe sovrani i shtetit tonë, Kosovës, dhe kjo është nisma e Vetëvendosjes.

Qytetari dhe qytetarja e Kosovës duhet të kujdeset për Kosovën më mirë se politikanët për të. Vetëvendosja duhet të jetë rrugë përmes së cilës do të ndizet ai patriotizmi i brendshëm që ekziston dhe ende nuk është fikur te secili qytetar dhe qytetare. Qytetari dhe qytetarja e Kosovës duhet të ketë vëmendjen se të gjithë, amerikanët, francezët, gjermanët, afrikanët, etj, vijnë dhe shkojnë ndërsa ai dhe ajo mbetet në Kosovë. Qytetari dhe qytetarja e Kosovës duhet të dijë që nuk ka Kosovë tjetër, as në SHBA. Sepse kjo është fara e qytetarisë, e patriotizmit dhe e demokracisë, pra, nga këtu ngritët dhe shpërndahet demokracia si rregullim i brendshëm politik në të cilin Vetëvendosja beson.

Vetëvendosje po niset nga aty ku takon, nga qytetari. Vetëvendosja duhet t’i kthehet qytetarit, edhe në formë të nismës politike zgjedhore, sepse qytetari dhe qytetarja e Kosovës sot është i vetëm, e vetmuar. Vetëvendosja duhet të ndërrojë realitetin në Kosovë, realitetin shoqëror, ekonomik dhe politik. Vetëvendosja duhet të instalojë demokracinë si sistem politik shoqëror. Vetëvendosja do t’i tregojë qytetarit dhe qytetares së Kosovës kjo Nismë është mënyrë, rrugë dhe mjet për zgjidhjen e problemeve. Qytetari dhe Vetëvendosja do të jenë këmbëngulëse gjithmonë duke e pasur parasysh mirëqenien e kësaj shoqërie dhe këtij shteti.

Dihet ajo lufta midis së mirës dhe së keqes. Përderisa e keqja e dinë se çfarë dëshiron (është e keqe dhe e lufton të mirën), shpesh filozofët pyesin: çka pas luftës kundër korrupsionit? Në fakt, asgjë. E mira ekziston për ta luftuar dhe për ta parandaluar të keqen. Kjo është e tëra. Kjo është lufta e përjetshme që e bën e mira. Sepse duke luftuar dhe punuar kundër së keqes i hapet mundësia të mirës. Pra, e mira e Kosovës është qytetari i Kosovës ndërsa e keqja e Kosovës është politikani i vet aktual, ndërsa nisma Vetëvendosje do të jetë mjet përmes së cilës qytetari dhe qytetarja e lufton të keqen.