Botë Nga Bota

Ushtari ukrainas përshkruan arratisjen nga “beteja më e egër e luftës” – nga ku Putin kishte urdhëruar që “as edhe një mizë të mos kalonte”

Para 1 viti

Një ushtar ukrainas që shpëtoi duke u arratisur nga një fabrikë çeliku të pushtuar nga Rusia thotë se kishte një shans “1 në 1000” që ai të dilte nga aty.

Sipas mediave të huaja, përcjell Telegrafi, Oleksandr Ivantsov, 29 vjeç, ka thënë se ishte në fabrikën e çelikut Azovstal në Mariupol, në jug të Ukrainës, kur trupat ruse e sulmuan atë në maj të vitit 2022.

Ndërsa shumë nga shokët e tij u dorëzuan, Ivantsov zgjodhi të fshihej dhe të përpiqej të kthehej në territorin e kontrolluar nga ukrainasit, sipas gazetës.

“Unë e vendosa për probabilitetin e suksesit në 1 në 1000”, tha ai, duke shtuar: “Isha gati për vdekje”.

Ivantsovit fillimisht do t’i bashkohej një ushtar tjetër dhe dyshja kishin mbushur një vend të fshehur me një dyshek të vjetër, si dhe me teneqe sardelesh dhe qeska me çaj e kafe.

Por në momentin e fundit ushtari tjetër thuhet se ka ndryshuar mendje dhe është larguar me të tjerët.

Kështu, Ivantsov mbeti i vetëm.

Ai i tha The Guardian se të gjithë mendonin se ai ishte i çmendur, por trupat i dhanë një orë me një busull dhe një elektrik dore.

Ndërsa të tjerët u larguan, Ivantsov tha se komandanti i tij “më shtrëngoi për dore dhe më uroi fat. Jam i sigurt se ai mendoi se do të vdisja”, përcjell Telegrafi.

Ivantsov qëndroi i fshehur në fabrikën e madhe për një javë ndërsa trupat ruse e inspektuan atë, dhe më pas doli jashtë i veshur me rroba civile, sipas Guardian.

Ai kaloi nëpër territorin e kontrolluar nga Rusia përpara se të kthehej në tokën e kontrolluar nga ukrainasit më 6 qershor 2022.

Arsyeja e tij kryesore për të bërë përpjekjen e rrezikshme ishte njohja e sistemit të burgjeve të Rusisë, për të cilin ai tha se e dinte se do të ishte “më i ashpër”, sipas gazetës.

“Unë nuk e konsideroj veten hero. Unë jam me fat”, tha ai.

Ndryshe, gjatë javëve të luftimeve, fabrika e çelikut Azovstal në Mariupol u bë streha e fundit i rezistencës së Ukrainës në qytet.

Fillimisht intensiteti i luftimeve në Mariupol ishte i tillë që presidenti ukrainas Volodymyr Zelensky tha se “dhjetëra mijëra” civilë mund të kishin vdekur.

Putini kishte urdhëruar trupat ruse të mos sulmonin centralin, por ta bllokonin atë në mënyrë që “as edhe një mizë të mos mund të kalonte”.

Pasi kaluan javë të tëra të izoluar me civilë, 265 ushtarë ukrainas atje u dorëzuan përfundimisht, raportoi Reuters në atë kohë, duke cituar shifra nga ministria ruse e mbrojtjes.

Sipas ministrisë, disa u dërguan në një burg të rihapur rishtazi në Olenivka, pranë kryeqytetit rajonal të Donetsk, si robër lufte, ndërsa 51 ushtarë të plagosur u trajtuan në Novoazovsk, sipas Reuters.

Oleksandr Didur, i cili shërbeu në Brigadën e 36-të Detare të Ukrainës pranë Mariupolit gjatë rrethimit të qytetit, ishte një nga ata të plagosur.

Ai i tha Business Insider vitin e kaluar se u dërgua në një spital, ku kaloi rreth një muaj duke marrë ndihmë të kufizuar mjekësore, përpara se të transferohej në një burg në Olenivka.

Në fillim të këtij muaji, Kievi njoftoi se Rusia kishte liruar 230 ushtarë dhe civilë ukrainas në shkëmbimin e parë të të burgosurve në gjashtë muaj.

Në mesin e të liruarve ishin ushtarë që kishin mbrojtur fabrikën e çelikut Azovstal, tha Zelensky në një deklaratë në atë kohë. /Telegrafi/