Ulet numri i rasteve aktive me COVID-19 në Maqedoni

Gjithsej 99 raste të reja me Covid-19 prej 1.384 testimeve janë regjistruar në raportin e djeshëm të Ministrisë së Shëndetësisë gjatë 24 orëve të kaluara. Kanë vdekur tetë pacientë, prej të cilëve dy nga Tetova (60 dhe 71), një nga Dellçeva (78), një nga Struga (63), një nga Shkupi (59), një nga Dibra (52) dhe dy nga Ohri (70 dhe 94). Janë regjistruar 214 pacientë të shëruar.

Numri i përgjithshëm i të diagnostikuarve me Covid-19 në vendin tonë, që nga fillimi i epidemisë arrin në 15.226, numri i pacientëve të shëruar është 12.700, i të vdekurve 631, ndërsa për momentin numri i rasteve aktive në vend është 1.895.

Nga numri i përgjithshëm i rasteve aktive, në Shkup ka 575, në Kumanovë 231, në Prilep 139, në Gostivar 114, në Tetovë 104.

Deri tani në vend janë bërë 159.387 testime në Covid-19.

Në Klinikën infektive janë pranuar tetë pacientë. Gjithsej janë të hospitalizuar 81. Në përkrahje me oksigjen janë 59, nuk ka pacientë në ventilim mekanik.

Në spitalin në Kozle janë hospitalizuar dy fëmijë dhe tri nëna pozitive në Kovid-19, ndërsa katër fëmijë dhe tri nëna të dyshimta në virusin. Në SPQ “8 Shtatori” në Shkup janë pranuar katër pacientë, ndërsa të hospitalizuar janë 26. Në respiratorë janë shtatë pacientë.

Në spitalin në Manastir janë të hospitalizuar 14, ndërsa në spitalin në Shtip janë të hospitalizuar 55 pacientë. Në repartet infektive në Tetovë, Ohër, Veles, Kumanovë, Prilep, Gostivar, Strumicë dhe Strugë janë hospitalizuar 122, pozitivë dhe të dyshimtë në Kovid-19.

Të dhënat për raste aktive sipas komunave në Shkup tregojnë se më së shumti ka në Aerodrom – 99, pas çka vijojnë Gazi Baba – 72, Karposhi – 63, Qendra – 62, Çairi – 55, Buteli 36, Gjorçe Petrovi – 34, Shuto Orizare – 23, Studeniçani – 17, Saraji – 16, Ilindeni – 11, Haraçina – 10, Sopishte – 4, Petroveci – 4, Çuçer Sandeva – 2, Zelenikova 1, gjashtë janë të huaj, ndërsa tre të papërcaktuar.

Edhe krahas apeleve që të respketohen masat dhe protokollet për mbrojtje, që i solli Qeveria për ballafaqim me Kovid-19, vazhdimisht po regjistrohen raste të reja për shkelje të tyre.

Të dhënat e fundit të Minsitrisë së Punëve të Brendshme për 24 orët e kaluara (7-8 shtator) tregojnë se në territorin e shtetit janë regjistruar 445 shkelje të masës për mosmbajtjen e mbrojtjes personale në fytyrë.