Ukraina thotë se rrëzoi 44 nga rreth 50 raketat që u lëshuan nga Rusia – tregon numrin e rusëve të vrarë që nga fillimi i agresionit

Ukraina sot pretendoi se arriti të rrëzonte 44 nga rreth 50 raketa që u lëshuan nga Rusia të hënën.

Megjithatë, kryeministri i vendit Denys Shmyhal tha se raketat dhe dronët rusë goditën 10 rajone të Ukrainës dhe dëmtuan 18 objekte, shumica e të cilave janë objekte energjetike, shkruan Sky News, përcjell Telegrafi.

Sulmet kanë goditur infrastrukturën kritike në Kiev, Kharkiv dhe qytete të tjera, duke ndërprerë furnizimin me ujë dhe energji elektrike këtë mëngjes.

Kjo po vlerësohet se është një hakmarrje e dukshme për atë që Moska pretendoi se ishte një sulm ukrainas në flotën e saj të Detit të Zi gjatë fundjavës.

Ministria ruse e mbrojtjes tha se forcat e saj kryen “sulme me armë me precizion të lartë ajror dhe me bazë detare me rreze të gjatë veprimi kundër komandës ushtarake dhe sistemeve energjetike të Ukrainës”.

Ministria tha në një deklaratë se qëllimet e sulmeve ishin “arritur” duke shtuar se “të gjitha objektivat e përcaktuara u goditën”.

Ndërkohë Ministria e Mbrojtjes e Ukrainës thotë se mbi 70,000 rusë janë vrarë, që nga fillimi i agresionit rus në fund të shkurtit.

Në një përditësim të postuar në Twitter, ministria shtoi se 2,686 tanke armike ishin shkatërruar – së bashku me 383 sisteme të shumta raketash. /Telegrafi/