Ukraina rrëzon shumicën e raketave ruse ndërsa luftimet intensive po zhvillohen në fushën e betejës

Mbrojtja ajrore e Ukrainës rrëzoi 10 nga 14 raketa të lëshuara nga Rusia në sulme vdekjeprurëse gjatë natës.

Kështu ka thënë të martën Shtabi i Përgjithshëm i Forcave të Armatosura të Ukrainës, shkruajnë mediat e huaja, përcjell Telegrafi.

Mbrojtja ajrore gjithashtu goditi një nga katër dronët Shahed të prodhuar nga Irani të lëshuar nga Rusia, thanë zyrtarët.

Ndryshe, në qytetin qendror të Kryvyi Rih, të paktën gjashtë persona u vranë, dhjetëra u plagosën dhe ekipet e shpëtimit po punonin për të çliruar njerëzit ende të bllokuar nën rrënoja.

“Fatkeqësisht, tashmë ka 6 të vdekur. Operacioni i shpëtimit vazhdon”, ka thënë Oleksandr Vilkul, kreu i administratës ushtarake të qytetit Kryvyi Rih, në një postim në Telegram.

Lexo po ashtu Pamje që tregojnë brutalitetin e ushtrisë së Putinit – ata qëllojnë edhe trupat e tyre, nëse tërhiqen nga lufta në Ukrainë

Por gjatë natës kishte edhe sulme të tjera ruse me granatimet që goditën rajonet verilindore të Ukrainës Sumy dhe Kharkiv, thanë Forcat e Armatosura të Ukrainës në një deklaratë.

Në rajonin jugor të Zaporizhzhia, tre bomba goditën qytetin e Orikhiv, duke vrarë një civil dhe duke shkatërruar shtëpi.

Ndërkohë zyrtarët dhe blogerët ushtarakë të mbështetur nga Rusia po raportojnë për luftime intensive përgjatë kufirit të rajoneve Donetsk dhe Zaporizhzhia, në një zonë ku forcat ukrainase kanë arritur përparime ditët e fundit.

Luftimet po zhvillohen në jug të qytetit Velyka Novosilka përgjatë të dy anëve të lumit Mokri Yaly, një zonë ku ukrainasit duket se kanë pasur sukses më të madh se kudo tjetër në fazat fillestare të kundërsulmimit të tyre.

Disa llogari ruse kanë pranuar se forcat e Kievit po bënin disa përfitime. /Telegrafi/