U zhduk për dy javë dhe askush nuk dinte asgjë për të, Roback: Jam shumë keq, vuaj nga depresioni

Emil Roback ka reaguar për herë të parë publikisht, ndërsa ka sqaruar edhe faktin që për 14 ditë kishte shkëputur çdo komunikim me këdo nga klubi i Norrkoping, ku ndodhet në formë huazimi nga Milani, gjë që i alarmoi të gjithë në klubin suedez, ku ishin të trembur për jetën e sulmuesit.

Në një intervistë për mediat suedeze, sulmuesi 20-vjeçar që është në pronësi të Milanit, zbuloi se vuan nga depresioni, ndërsa shtoi se është shumë i sëmurë.

“Nuk doja të shihja askënd përveç familjes. Vuaj nga depresioni. Nuk jam ndier mirë kohët e fundit, në fakt ndihem shumë keq. Ndjeva se gjërat nuk ishin në vendin e duhur dhe u mbylla në vetvete. Ndoshta nuk ishte gjëja e duhur për të bërë, por kështu ka ndodhur. Mendoj se është depresion, por është diçka që nuk e kam përjetuar kurrë më parë”, ka thënë Roback.

20-vjeçari ishte duke luajtur për grupmoshat U21 të ekipit suedez Hammarby kur tërhoqi interesimin e Milanit.

Pasi u transferua në Itali, Roback fillimisht u aktivizua për të rinjtë e Milanit para se të ftohej në disa ndeshje për ekipin e parë.

Në janar të vitit 2022, ai bëri debutimin me fanellën e Milanit, teksa hyrë në fushë nga banka rezervë në minutat e fundit të fitores së Milanit me rezultat 3-1 ndaj Genoas në Kupën e Italisë.

Suedezi me prejardhje nga Gambia, nuk la përshtypje të mëdha për Rossonerët dhe u huazua menjëherë, fillimisht në Danimarkë tek ekipi i Nordsjaelland dhe më pas në Suedi tek Norrkoping, aty ku edhe luan aktualisht./Telegrafi/