U vënë në kërkim të “këmbëmadhit” dy burra gjenden të vdekur në Washington

Dy burra u gjetën të vdekur në një pyll të largët ndërsa kërkonin për këmbëmadhin i njohur zakonisht si Bigfoot, sipas autoriteteve në shtetin e Uashingtonit.

Dy burrat nga Portland, Oregon, u gjetën të vdekur pas një kërkimi treditor që u nis në ditën e Krishtlindjes, pasi një anëtar i familjes raportoi se çifti nuk ishte kthyer nga një udhëtim në pyllin kombëtar Gifford Pinchot për të kërkuar prova të krijesës mitike.

Kërkimi përfshiu mbi 60 vullnetarë që kërkonin me aeroplanë dhe qen në terrene të pyllëzuara dhe kushte moti brutalisht të ftohtë, tha në një njoftim për shtyp zyra e sherifit të qarkut Skamania.

“Të dyja vdekjet duket se janë për shkak të ekspozimit, bazuar në kushtet e motit dhe gatishmërinë e keqe”, thuhet në deklaratë.

Zyra e sherifit gjeti një veturë që i përkiste viktimave pranë qytetit Willard, thuhet në deklaratë dhe kërkimi u ripërqëndrua në atë zonë.

U përdorën gjithashtu dronë dhe një ekip helikopterësh të Rojës Bregdetare u thirr për të ndihmuar në kërkim.

Zyrtarët nuk kanë dhënë emrat e dy viktimave, të moshës 37 dhe 59 vjeç.

Kushtet e motit në malet e Kaskadës kishin qenë të ftohta ditët para dhe gjatë kërkimit, të cilat përfshinin borë, shi të acartë dhe temperatura nën zero.

Ekipet e shpëtimit gjithashtu duhej të luftonin nivelet e larta të ujit në lumenj dhe pemët e rrëzuara. /Telegrafi/