Topi: Dialog sa më shpejt

Presidenti Bamir Topi u takua të martën me Përfaqësues të Forumit për Demokraci dhe Etikë, politikanë, intelektualë nga shoqëria civile, studiues dhe studentë, me të cilët pati një bisedë të hapur lidhur me situatën e vështirë aktuale në vend dhe shqetësimet e shkaktuara prej saj.

Presidenti tha se për të realizuar ëndrrën e tyre euroatlantike qytetarët shqiptarë janë në pritje të ankthshme të rivendosjes së një dialogut politik institucional mes forcave kryesore politike në vend dhe se kjo gjendje është e patolerueshme. Presidenti Topi mbështeti dhe inkurajoi të gjithë përfaqësuesit e shoqërisë civile që të luajnë rolin e tyre individual dhe të organizuar në këtë situatë për ndërgjegjësimin e mendjeve të nxehta që të ulin tonet e ashpra të akuzave dhe kundër akuzave, të lenë pas gjuhën e urrejtjes e të gjejnë sa më shpejt atë të dialogut për ta nxjerrë vendin nga kjo situatë e vështirë.

Përfaqësuesit e Forumit për Demokraci dhe Etikë vlerësuan lart mesazhin e dhënë të hënën nga presidenti Topi për të gjitha forcat dhe aktorët politikë në vend duke shprehur mbështetjen e tyre për pozicionin e palëkundur dhe rolin moderator e stabilizues të presidentit si garant i Kushtetutës dhe ligjeve dhe si simbol i unitetit të popullit.

Përfaqësuesit e Forumit të cilët e quajnë veten “Dërgata e dorëzënëve të paqes”, e njohën presidentin Topi me nismën e tyre më të fundit qytetare për qetësimin e situatës dhe gjetjen “e dritës në fund të tunelit”, në mënyrë që palët e përfshira të ndërpresin menjëherë konfliktin, të ulin tonet dhe të ndalojnë sulmet ndaj institucioneve të pavarura kushtetuese, duke rivendosur një klimë qëndrueshmërie dhe duke rritur mirëbesimin e qytetarëve tek përfaqësuesit e tyre politikë të zgjedhur dhe sidomos te funksionimi normal i shtetit të së drejtës dhe institucioneve. /Telegrafi/