Thaçi u thotë euro-parlamentarëve se nuk do të lejojë të dënuar në politikë

Presidenti i vendit, Hashim Thaçi, ka pritur delegacionin e deputetëve të Parlamentit Evropian, i cili tha se do të iniciojë hartimin e një kodi që nuk do të lejojë njerëz të dënuar në skenën politike.

Presidenti i vendit, Hashim Thaçi ka pritur në presidencë delegacionin e deputetëve të Parlamentit Evropian të cilët do të qëndrojnë në Kosovë për të marrë pjesë në takimin e Komisionit Parlamentar BE-Kosovë, ku do të diskutohet për Marrëveshjen e stabilizim-asociimit, transmeton televizioni publik.

Me këtë rast, Thaçi ka thënë se vizita e tyre është hap i ri dhe hapje e një kapitulli evropian për Kosovën.

“Mund të themi se muajt e parë të këtij viti kanë qenë evropian për Kosovën, falënderoj eurodeputetët për mbështetjen që i kanë dhënë Kosovës. Do t’i kryejmë të gjitha obligimet tona që liberalizimi të bëhet sa më shpejt dhe qytetarët të lëvizin lirshëm”, ka thënë Thaçi.

Tutje, ai ka thënë se do të punojnë edhe për implementimin e Marrëveshjes për demarkacionin me Malin e Zi.

“Do të inicioj hartimin e një kodi që nuk do të lejojë njerëz të dënuar në skenën politike dhe as në institucionet e Kosovës”, ka thënë Thaçi.