Thaçi, takime me burrështetas evropianë dhe amerikanë

Kryeministri Hashim Thaçi në ditën e dytë të vizitës së tij zyrtare në Republikën e Kroacisë, ku me ftesë të kryeministrit të këtij vendi po merr pjesë në punimet e Samitit Kroacia 2009, që po mbahet në Dubrovnik, ka zhvilluar takime me zëvendës-sekretarin amerikan të Shtetit, James Steinberg, përfaqësuesin e Presidencës së radhës të BE-së, ministrin e Jashtëm të Suedisë, Carl Bildt dhe me përfaqësuesen e Parlamentit Evropian, Doris Pack.

Thaçi gjatë qëndrimit në Dubrovnik, ka takuar edhe kryeministren e Kroacisë, Jadranka Kosor, kryeministrin e Malit të Zi, Millo Gjukanoviq, kryeministrin e Bosnjës dhe Hercegovinës, Nikolla Shpiriq, ministrin e Jashtëm të Sllovakisë, Miroslav Lajçak, ministri e Jashtëm të Maqedonisë, Antonio Milloshoski dhe ministrin për Çështje Evropiane të Turqisë, Egemen Baish.

Në këto takime – siç thuhet në një kumtesë të Kryeministrisë – Thaçi ka prezantuar përkushtimet e institucioneve të Republikës së Kosovës për stabilitetin politik dhe zhvillimin ekonomik në Kosovë dhe në regjionin e Evropës Juglindore. Thaçi ka potencuar përparimet e Republikës së Kosovës për plotësimin e të gjitha kritereve për anëtarësim në Bashkimin Evropian dhe në NATO.

Qeveria dhe institucionet e Kosovës, ka theksuar ai do të vazhdojnë të miratojnë standardet e BE-së në tregun e brendshëm, në politikat shtetërore dhe në gjyqësinë e vendit. “Ne do të vazhdojmë të ndjekim dhe të kompletojmë objektivat tonë në përputhje me Planin për Veprim të Kosovës për Partneritet Evropian”, është shprehur kryeministri Thaçi.

Në këto takime me burrështetas evropianë dhe amerikanë, si dhe me udhëheqësit shtetëror të vendeve të Evropës Juglindore, kryeministri Thaçi është fokusuar edhe tek fryma bashkëpunuese dhe e fqinjësisë së mirë, që po promovon Qeveria e Republikës së Kosovës me vendet e rajonit. Stabiliteti dhe paqja hapin perspektiva për investime, për zhvillim dhe për të gjitha iniciativat tona të përbashkëta, ka thënë Thaçi. /Telegrafi/