‘Do të аkomodohen personat e pastrehë për shkak të temperaturave të ulëta’

Ministria e Punës dhe Politikës Sociale, së bashku me qendrat për punë sociale dhe organizatat komunale të Kryqit të Kuq do t’i identifikojnë të gjithë personat e pastrehë dhe në rrezik, dhe përkohësisht do t’i akomodojë në dy Qendra pranimi në Momin Potok dhe Çiçino Sello. Ato familje të cilat kanë fëmijë më të vegjël se tre vjet do të akomodohen në “Ranka Millanoviq” dhe “25 Maj”, përcjell Telegrafi Maqedoni.

Nëse paraqitet nevoja për akomodim të personave jashtë Shkupit, në bashkëpunim me MASH-in do të hapen konviktet shkollore nëpër qytetet e Maqedonisë, ndërsa nëse dikush ka nevojë për kujdesje ose sërish ndonjë qytetar vëren person të cilit ajo i nevojitet mund të paraqitet në numrin 195.

Këto janë një pjesë e masave për zbatimin e të cilave janë dakorduar në takimin e sotëm përfaqësuesit e MPPS-së, Kryqit të Kuq dhe Qendrave për punë sociale.

“Pas rekomandimeve të Komitetit drejtues për kriza MPPS mori detyra të caktuara dhe së bashku me qendrat për punë sociale dakorduam hapa në drejtim të ndërmarrjes së masave për shkak të paralajmërimit në kohë dhe temperaturave të ulëta të pritura në Maqedoni. Ministria, Kryqi i Kuq, vetëqeverisjet lokale dhe bashkësitë lokale do të bëjnë identifikim të personave në rrezik, edhe pse ka informata dhe shifra të caktuara, ato do të kontrollohen edhe njëherë që të mundet atyre personave t’u ndihmohet në periudhën kur pritet moti i ligë”, tha ministri i Punës dhe Politikës Sociale Ibrahim Ibrahimi pas takimit të sotëm, njofton AIM.

Sqaroi se personat nga Shkupi do të akomodohen në Momin Potok dhe në fshatin Çiçino, ndërsa familjet të cilat kanë edhe fëmijë deri në moshën tre vjeçare në konviktet “Ranka Milanoviq” dhe “25 Maji” në Shkup. Në bashkëpunim me Ministrinë e Arsimit dhe Shkencës, shtoi, do të hapen konviktet në Maqedoni nëse ka nevojë për kujdesje jashtë Shkupit.

Suzana Tuneva-Paunovska nga Kryqi i Kuq i qytetit të Shkupit informon se ekipi për përgjigje gjatë katastrofave veçmë është mobil.

Në pjesën e përkrahjes së të pastrehëve, shtoi, në bazë ditore tani ka pranim të 8 deri në 10 persona.

“Pritet numri të rritet kur temperaturat do të jenë më të ulëta, por ne gjatë tërë vitit jemi në kontakt me ato sepse këtu janë më së shumti përkatësisht 148. Jashtë Shkupit ka numër të vogël të personave sepse ndihma ndërfqinjësore është zhvilluar në rajonet jashtë Shkupit. Në mjediset urbane ka tjetërsim dhe numër më të madh të personave të cilëve u nevojitet përkrahje nga Kryqi i Kuq dhe institucionet e sistemit”, tha Tuneva Paunovska. /Telegrafi/