Stuhi e fortë bore në SHBA, pjesa më e madhe e vendit në gatishmëri të lartë

Dhjetëra miliona amerikanë po përgatiten për një stuhi të madhe dimri që mund të sjellë reshjet më të mëdha të borës dhe temperaturat më të ftohta në më shumë se një dekadë.

Stuhia, e cila filloi në mes të SHBA-së, do të lëvizë në lindje në dy ditët e ardhshme, ka njoftuar Shërbimi Kombëtar i Motit (NWS).

Ndërsa një gjendje e jashtëzakonshme është shpallur në shtetet e Kentuckyt dhe Virginias, pjesë të SHBA-së si Mississippi dhe Florida janë paralajmëruar të presin kushte të vështira moti.

Parashikuesit thonë se moti ekstrem po shkaktohet nga vorbulla polare, një zonë me ajër të ftohtë që qarkullon rreth Arktikut, shkruan BBC, përcjell Telegrafi.

“Për disa, këto mund të jenë reshjet më të mëdha të borës në më shumë se një dekadë”, tha Administrata Kombëtare Oqeanike dhe Atmosferike.

Parashikuesi i AccuWeather Dan DePodwin tha: “Kjo mund të çojë në janarin më të ftohtë për SHBA-në që nga viti 2011”.

Ai shtoi se “temperaturat që janë shumë nën mesataren historike” mund të qëndrojnë për një javë.

Ato temperatura të ulëta do të jenë edhe në bregdetin lindor, ku stuhia pritet të arrijë mbrëmjen e së dielës.

Bëhet e ditur se në SHBA-në qendrore, do të ketë “ndërprerje të konsiderueshme në jetën e përditshme” dhe “kushte të rrezikshme ose të pamundura drejtimi dhe mbyllje”.

Disa zona të Kansasit dhe Indianas mund të shohin të paktën 20.3 cm borë

“Kushtet do ta bëjnë udhëtimin jashtëzakonisht të rrezikshëm, me rrugë të pakalueshme dhe një rrezik të lartë të bllokimit të shoferëve”, paralajmëroi NWS. /Telegrafi/