Stoltenberg: Misioni i NATO-s në Kosovë mbetet funksional përkundër COVID-19

Ministrat e Mbrojtjes të NATO-s do të diskutojnë për pasojat e dezinformimin, që ka marrë hov, veçanërisht pas shpërthimit të pandemisë së coronavirusit.

“Jemi dëshmitarë të veprimeve të aktorëve shtetërorë dhe jo-shtetërore të cilët po bëjnë përpjekje që duke e përdorur pandeminë të na përçajnë”, tha Sekretari i Përgjithshëm i NATO-s, Jens Stoltenberg në një konferencë për media, transmeton REL.

“Aleatët duhet të punojnë së bashku për të gjurmuar dhe zbuluar këto përpjekje”, shtoi Stoltenberg, duke vlerësuar se mënyra më e mirë për t’u marrë me këtë fenomen është duke paraqitur fakte dhe të vërteta.

Sipas Stoltenberg, ministrat e NATO-s do të marrin pjesë në një video-konferencë të mërkurën, dhe një nga temat kryesore do të jetë përgjigja e përbashkët e të gjithë aleatëve ndaj propagandës.

Stoltenberg tha se po bëhet çdo gjë e mundur që kriza e coronavirusit të mos bëhet një krizë e sigurisë.

Ai theksoi se operacionet e Aleancës në botë, përfshirë Kosovën dhe Afganistanin, janë akoma funksionale, megjithëse me masa parandaluese të përhapjes së koronavirusit.

“Misioni i NATO-s është të ruajë jetën e njerëzve”, paralajmëroi Jens Stoltenberg, duke shtuar se kriza e shkaktuar nga coronavirusi do të ketë pasoja të gjera.