Stalini, Hrushqovi, Brezhnjevi e Enveri, model për Qeverinë e Kosovës!

Ka tri javë ditë rresht që po shohim, po dëgjojmë e po lexojmë "lajmin" e prodhuar nga gazetaria e UNMIK-ut, Lajmin me titult si:

1. "Policia sot pengoi një autobus me qytetarë të Kosovës (kupto shqiptarë se serbë jo se jo) që të mos ikin me autobus nga Kosova për në Serbi, e më tutje për në perëndim".

Lexojmë e shohim "lajmin" e Hashimit:

2. "Sot as policia nuk po ia arrin ta pengoj ikjen e qytetarëve nga Kosova",

Gazetaria e Isës lanson këtë lajm:

3. "Policia e Kosovës sot ndaloi me dhunë një furgon me plot burra, gra e fëmijë duke ikur nga Kosova"…

Ja "lajmi" i gazetarucëve të partisë që u prodhua këto ditë:

4. "Sot, nga Policia e Kosovës, u ndaluan tre autobusë me qytetarë duke ikur përmes Serbisë për në Hungari"….

Ky lajm i keq më shqetëson, mua ky lajm më mërzit, mua ky lajm më dëshpëron, mua kjo gazetari po më copëton, jo për faktin se përse ikin shqiptarët e varfër nga Atdheu e vendi i tyre e me Qeveri të tyre shqiptare, por për mua është diçka tjetër e "pakuptueshme", e "pakapshme" dhe aspak racionale!

Pyes me zë të lartë e në panik: Si mund të ndalen arratisjet e hallexhinjve dhe të varfërve me polici e me dhunë policore?

A jeni duke parë se jeni bërë shtet policor e fashist?

A jeni duke kuptuar se s’ka vlera në këtë hapësirë politike?

Komunisti Enver Hoxha tentoi të ndalonte me polici e ushtri ikjen e shqiptarëve të varfër nga Shqipëria. Pa sukses!

Policia dhe Ushtria komuniste në kohën e Ramiz Alisë, me polici dhe tanke provoi të ndalojë ikjen e madhe të popullit nëpër ambasadat perëndimore. Por, përsëri, pa sukses!

Nikolae Çaushesku, presidenti komunist i Rumanisë, po ashtu, me polici e ushtri tentojë të ndalojë ikjen e rumunëve nga varfëria e skamja për në Perëndim. Edhe ky pa sukses!

Stalini, Hrushqovi, Brezhnjevi, tentuan të ndalojnë ikjen nga ferri e varfëria popujt e ish-BRSS për në Perëndim, por pa sukses!

Erichk Honecker, presidenti i Gjermanisë socialiste, nuk ia doli të ndalojë ikjen masive të gjermanëve të varfër për në Hungari!

Tani përsëri pyes: cilët janë ata policë të mjerë që po zbatojnë urdhrat e Qeverisë së Hashimit e të Isës. Me polici do ta normalizojë gjendjen e mjerueshme ekonomike e sociale të Kosovës?

A ka këshilltarë me "dy palë mend" kabineti i Qeverisë së Kosovës?

Si more luftohet varfëria me polici e me ushtri, o Hashim? O Isë?

Problemet sociale janë të krijuara nga politikat e këqija të Qeverisë së Kosovës.

Shqiptarët e varfër, që po braktisin me zemër të thyer vendlindjen, nuk janë kriminelë e as rast për polici e as për hetuesi gjyqësore. Jo, këta janë viktima dhe produkt i qeverisjes së keqe, krimit ekonomik e papërgjegjësisë sonë kolektive…

Varfëria mesjetare në Kosovën e vogël është krijuar nga politikat kapituluese të njerëzve ne pushtet.

Ikjen e Shqiptarëve të varfër e të sëmurë nga Kosova nuk e pengon e nuk e ndalon dot milicia e Hashimit, e as milicia e Isës. Vetëm me politika humane, me ekonomi larghedhëse nacionale e sociale mund ta ndryshojmë e ta pengojmë ikjen masive të shqiptarëve me shëndet të ligështuar e të varfëruar.

E, as Ti Hashim, e as ti Isë, nuk mund ta bëni këtë ndryshim.

Frikohem fort se këtë ndryshim të mirë nuk do ta bëjë as edhe opozita e sodit.

Mintutat e fundit për ne si kolektiv po na rrëshqasin… Kohë s’kemi shumë, vullnet kemi pak, e politikanë për popullin thuaja aspak!