Skuadra më e dhunshme në botë përjashton futbollistin pasi rrahu kundërshtarin dhe gjyqtarin (Foto/Video)

Skuadra quhet Canelas 2010 dhe njihet si ekipi i futbollit më i dhunshëm në botë. Por, edhe në një klub me një status të tillë, nuk mund ta pranojë që lojtari të godasë gjyqtarin.

Për këtë arsye, skuadra portugeze përjashtoi përjetë sulmuesin Marco Goncalves, që goditi gjyqtarin me gju në fytyrë, duke e shembur në tokë pa ndjenja.

Gjithçka nisi në momentin kur Goncalves u përplas me një mbrojtës kundërshtar, të cilin e goditi. Gjyqtari ndërhyri menjëherë, duke i treguar kartonin e kuq, por sulmuesi doli nga kontrolli dhe goditi edhe drejtuesin e ndeshjes.

Policia ndërhyri në fushë për të qetësuar situatën dhe sherrin masiv të nisur në terrenin e lojës, por në fund ndeshje u ndërpre dhe futbollistët u larguan drejt dhomave të zhveshjes nën masa të forta sigurie, transmeton Supersport.

Ngjarjet në ndeshjen e vlefshme për fazën finale të turneut rajonal në Porto konfirmoi famën e keqe që ka ekipi i Canelas 2010.

Skuadra portugeze bëri bujë në Dhjetor të vitit 2016 pasi kishte fituar 12 ndeshje radhazi në tavolinë, sepse ekipet kundërshtare nuk paraqiteshin në fushë prej dhunës që ushtrohej ndaj tyre.

Canelas është një skuadër e përbërë nga tifozë ultras të Portos, që njihen për kërcënimet dhe dhunën ndaj lojtarëve dhe arbitrave në fushë.