“Sigali sigurt në final four”

U nis me shumë bujë, pesimizëm, kritika e deri tek bojkoti nga klubet serbe. Mirëpo, tash tri javë pas fillimit të garave në Ligën Ballkanike (BIBL), Sigal Prishtina e Peja kanë treguar se basketbolli kosovar e meriton plotësisht të jetë pjesë e garave ndërkombëtare.

Njëri ndër lojtarët më të mirë kosovarë të lojës midis koshave, Ferid Zekolli beson se ekipet kosovare përveç pjesëmarrjes do të arrijnë edhe rezultate të lakmueshme.

Sipas Zekollit, Sigal Prishtina dhe Peja kanë ekipe mjaft cilësore madje ndër më kualitativet në BIBL. “U pa qartë se Peja kishte emocione ndaj Levskit. Peja di të luajë shumë më mirë dhe besoj se së shpejti do të konsolidohet. Peja ka një ekip mjaft të mirë dhe jam i bindur se në lojërat e ardhshme do ta tregojnë veten”.

“Ata duhet të lirohen nga emocionet dhe të luajnë basketboll, e rezultatet do të vijnë vetë. Ndërsa Prishtina është në rrugë të mirë për të arritur suksese në këto gara pasi që ka një kryesi mjaft punëtore. Mendoj se ekipi i Sigalit është për një nuancë më i mirë se ekipet e tjera të BIBL dhe jam e bindur se do të arrij shumë”, tha Zekolli. Ai po ashtu ka theksuar faktin se motivimi i lojtarëve është kyç për ndeshje të tilla.

“Mendoj se mangësia më e madhe e basketbollit kosovar qysh prej pas luftës është përvoja. Lojtarët tanë janë mësuar të luajnë gjithmonë me shënime nga distanca. Nëse kjo iu dështon ata demoralizohen plotësisht. Prandaj mendoj se shtabi teknik duhet të jetë shumë i kujdesshëm që t’i motivojë lojtarët duke i qetësuar dhe sensibilizuar ata, gjë që tek ne po mungon. Sido qoftë, besoj fuqishëm se basketbolli në vendin tonë ka një perspektivë” shtoi Zekolli.

Edhe krerët e Sigal Prishtinës dhe Pejës janë deklaruar mjaft të kënaqur me rrjedhën e deritanishme të garave. “Ne kemi punuar prej verës për ta formuar një ekip të tillë çfarë e kemi tash. Edhe pse ndeshjen e fundit e humbëm në mungesë të fatit, ne kemi një seri mjaft të mirë. E tëra çfarë mund të ju premtoj është se Sigalin do ta keni në final-four” ka thënë drejtori gjeneral i Sigal Prishtinës, Florian Miftari. /Zëri/Telegrafi/