Sigali dhe Peja presin fitore të reja

Sonte dhe nesër mbrëma zhvillohen ndeshjet e xhiros së dytë të ETC Superligës së Kosovës. Padyshim se ndeshja kryesore zhvillohet sonte në Prizren, në të cilën Bashkimi e pret Sigal Prishtinën. Bashkimi nuk është ai i viteve të kaluara, që u pa qysh në xhiron e parë ndaj Pejës, por megjithatë ai mbetet kundërshtar që meriton respekt.

Ekipi prizrenas pësoi debakël nga Peja dhe kjo ka bërë që atë të kërkojnë të rimarrin veten kundër Prishtinës. Trajneri i Bashkimit Edin Kërvesh e ka pranuar se do ta kenë mjaft vështirë kundër Sigalit, por duhet të luajnë dhe kërkojnë befasinë.

“Bashkimi këtë vit ka ngecur paksa në riorganizim. Vonesa e sponsorëve e ka bërë të vetën, e po ashtu edhe vonesa në përgatitje. Sigali dhe Peja kanë zhvilluar nga tri faza përgatitore dhe janë shumë të përgatitur. Ndaj Sigalit do të jetë shumë e vështirë, pasi që ata këtë vit kanë mbledhur ajkën e basketbollit të Kosovës duke krijuar një ekip të pandalshëm. Mirëpo edhe pse do të jetë mjaft e vështirë, angazhimi ynë do të jetë maksimal për të arritur rezultat pozitiv” tha Kërvesh.

Mungesë e madhe për Bashkimin jenë tifozët, të cilët nuk do të kenë mundësi të përkrahin ekipin e tyre nga tribunat për shkak të dënimit nga FBK-ja. Në anën tjetër, ekipi i Sigal Prishtinës vjen pas një fitore bindëse ndaj Dritës, në të cilën kryeqytetasit shënuan hiq me pak se 108 pikë. Prishtinasit presin edhe fitore tjetër të lartë para sfidës së parë në Ligën Ballkanike me 16 tetor me Kumanovën.

“Jemi 100% të përgatitur. Ne shkojmë si çdo herë për fitore edhe pse fitore të sigurt nuk ka asnjëherë. Ekipi është në formë mjaft të mirë, përveç Dardan Berishës, i cili ende nuk është plotësisht gatshëm. Bashkimi është një ekip tradicionalisht i fortë dhe ndeshja ndaj Pejës mendoj se ishte një moment dobësie”, ka deklaruar drejtor i Sigalit, Florian Miftari.

Ndeshje tjetër mjaft interesante pritet të jetë edhe ajo në Pejë në të cilën takohen rivalët e vjetër, Peja dhe Trepça. Kampionët aktual e nisi mjaft mirë stinorin e sivjetmë, pasi demoloi Bashkimin 52:91. “Minatorët” ndeshjen e parë u mposhtën nga debutuesi, Kastrioti, që tregoi qartë se këtë vit Trepça është larg nga forma e dikurshme. /Zëri/Telegrafi/

ETC Superliga – java 2

e mërkurë
Peja –Trepça, 19:00
Drita – Besa, 19:00
Bashkimi – Sigal Prishtina, 20:00

e enjte
RTV 21 – Kastrioti, 19:00