Sigal Prishtina hap dyert për shoqatat e personave me nevoja të veçanta

Klubi i basketbollit, Sigal Prishtina, ka lëshuar një komunikatë për shtyp në të cilën tregon se kanë marrë vendim që nga tash e tutje në ndeshjet që do t’i zhvillojë si vendas, do t’i ftojë të gjitha shoqatat e personave me nevoja të veçanta.

Në vazhdim mund ta lexoni komunikatën e plotë të klubit në fjalë:

“Me anë të këtij njoftimi, dëshirojmë të ju njoftojmë për vendimin që kemi marrë si klub për të promovuar sa më shumë sportin në Prishtinë dhe në Kosovë, dhe për t’i afruar sa më afër Klubit edhe një pjesë shumë të rëndësishme të shoqërisë tonë, atë të personave me nevoja të veçanta. Përveç angazhimeve të mëdha në paraqitjen sa më të mirë të skuadrës sonë në terren, jemi duke punuar shumë në krijimin e një imazhi të lartë organizativ dhe edukativo-sportiv, në mënyrë që sa më shumë të rinj të kenë mundësi për ta shprehur potencialin e tyre në sport, por edhe të shoqërohen e të argëtohen me emocionet që sjell sporti, e në veçanti atmosferën që krijojnë tifozët tanë më të mirë dhe më besnikë “Plisat”.

KB SIGAL Prishtina ka vendosur që në lojët e saja të ftojë shoqatat e personave me nevoja të veçanta, si Hendikos, Autizëm, Shoqata e të Shurdhërve, Sindroun Down, Handikap Kosova, Shoqata e të Verbërve, Klubi Dëshira dhe Shoqata e Prindërve OPPFAKOS.

Këto shoqata do të jenë prezent që nga ndeshja e nesërme që KB SIGAL Prishtina e zhvillon kundër KB Besa nga ora 20:00.

Ne jemi duke synuar që në një të ardhme të afërt të ftojmë edhe nxënësit e shkollave fillore dhe të mesme të Prishtinës, në mënyrë që të shoqërohen dhe argetohen me emocionet që sjell sporti.

Faleminderit”. /Telegrafi/