WHO: Shtetet të investojnë në trajtimin e depresionit për të ulur numrin e vetëvrasjeve

Është absurde të mendojmë se pavarësisht sa të përhapura janë bërë problemet e shëndetit mendor dhe sa shumë ndikojnë në përditshmërinë e njerëzve, ne ende nuk jemi të aftë t’u dhurojmë atyre mbështetje adekuate dhe trajtim të duhur.

Anë e mbanë botës njerëzit ende presin në lista me muaj të tërë për t’u trajtuar, ndërsa ankesat e tyre shpeshherë injorohen apo nuk merren seriozisht, transmeton Telegrafi.

Por, tani ekziston edhe një arsye tjetër se përse duhet të fillojmë t’i marrim sëmundjet mendore me seriozitet dhe t’u dhurojmë mbështetjen që e meritojnë atyre që vuajnë nga depresioni: Sipas Organizatës Botërore të Shëndetësisë, depresioni tani është shkaktari kryesor i paaftësive anë e mbanë botës.

Rastet e depresionit janë rritur për thuajse 20 për qind brenda një dekade, ku 322 milionë njerëz janë diagnostikuar me këtë sëmundje deri në vitin 2015.

Margaret Chan, nga organizata në fjalë, i quan këto shifra alarmante dhe bën thirrje që shtetet të ndërmarrin hapa për trajtimin e sëmundjeve mendore dhe ta trajtojnë këtë problem me urgjencën që e meriton.

Ajo tregon se në shumicën e shteteve të zhvilluara, pothuajse gjysma e njerëzve që vuajnë nga depresioni nuk diagnostikohen me këtë sëmundje dhe aq më pak nuk marrin trajtim. Ndërsa, në shtetet më pak të zhvilluara, kjo shifër e numrit të pa diagnostikuar me depresion arrin deri në 90 për qind.

Kjo është e papranueshme!

Investimi në trajtim më të mirë të depresionit do ta zvogëlonte numrin e vetëvrasjeve që ndodhin brenda një viti, duke shpëtuar qindra mijëra jetë dhe duke i bindur njerëzit se është në rregull të kërkojnë ndihmë.

Sipas Organizatës Botërore të Shëndetësisë, për çdo 1$ që investohet në trajtimin e depresionit dhe shqetësimit, shtetet do t’i marrin 4$ nga ajo shifër falë shëndetit të përmirësuar dhe produktivitetit. /Telegrafi/