‘Shqiptarët janë qytetarë të Republikës së Maqedonisë dhe kanë të drejtë që të kërkojnë më shumë të drejta’

Shqiptarët janë qytetarë të Republikës së Maqedonisë dhe kanë të drejtë që të kërkojnë më shumë të drejta. Kështu mes tjerash tha profesori universitar Temellko Ristevski gjatë debatit në emisionin “Arena” në TV Shenja. Ristevski theksoi se platforma e partive politike shqiptare mund të implementohet në suaza të Kushtetutës së Republikës së Maqedonisë dhe kësisoj, platforma fare nuk paraqet rrezik për Maqedoninë.

“Me platformën e partive politike shqiptare, absolutisht nuk kanoset unitariteti i Republikës së Maqedonisë, për shkak se kjo platformë mund të realizohet në suaza të Kushtetutës së Republikës së Maqedonisë. Për shembull çështja e gjuhës. Nëse shohim nenin e 7-të të Kushtetutës, në këtë nen janë të parapara të gjitha mundësitë që kërkohen në platformë dhe nuk ka nevojë të ndryshohet Kushtetuta”, tha profesori universitar, Temellko Ristevski.

Ndërkohë, ish deputeti Muhamed Halili, tha se vendimi i Ivanovit është vetëm një vazhdimësi e politikës 26 vjeçare të VMRO-DPMNE-së, duke shtuar se Ivanovi nuk është i autorizuar fare për të ndërhyrë në platformat e partive politike.

“Personi Ivanov nuk e respekton Kushtetutën dhe Ligjin, sepse neni 8 i Kushtetutës së Republikës së Maqedonisë është i qartë, se një ndër vlerat kryesore të rendit kushtetues të Maqedonisë është sistemi demokratik pluralist dhe zgjedhjet e lira dhe të drejtpërdrejta. Në bazë të zgjedhjeve të lira dhe demokratike, këtu nuk bëhet pazar a ka dëshirë ai ta japë mandatin apo s’ka dëshirë”, tha ish deputeti, Muhamed Halili.

Për ish deputetin Nazer Ziberi, vendimi i Ivanovit jo vetëm që është kundër-kushtetues, por i njëjti mund të ketë reperkusione të rënda për sigurinë e vendit. Sipas tij, qëllimi i këtij skenari është që të shpëtojë Gruevskin dhe strukturën afërt tij nga përballja me drejtësinë.

“Finalja e gjithë kësaj është krijimi i kushteve për mos t’u përballë me drejtësinë të një strukture e cila në bazë të vendimeve të Prokurorisë Speciale, dyshohet se është kryerëse e veprave të rënda penale. Pra, qëllimi është mos përballja me drejtësinë”, tha ish deputeti, Nazer Ziberi.

Të pranishmit në debat, nuk shohin rrugëdalje tjetër nga situata e krijuar, përpos që Ivanov të tërheqë vendimit e tij dhe ta respektojë Kushtetutën e vendit, duke ia dhënë mandatin Zoran Zaevit i cili ka shumicën parlamentare./Telegrafi/