Shiten të gjitha biletat, ‘ndizet’ tregu i zi

Ndeshja e parë historike e Kosovës kundër Haitit, përveç gjërave pozitive rreth organizimit dhe çdo gjëje tjetër, ka filluar ta tregojë edhe anën negative. Shitje e biletave ka filluar të shtunën, ndërsa janë shitur të gjitha të dielën në ora 15:30 . Me biletat e ndeshjes ka filluar të bëhet ‘pazar’, pasi në tregun e zi janë duke u shitur tri herë më shtrenjtë. Agron Selimi paralajmëron se ata që i keqpërdorin biletat mund të dënohen nga 2 muaj deri në tri vite burg, sipas ligjeve.

Gjithçka filloi të shtunën kur kryeministri i Kosovës, Hashim Thaçi, është parë në sheshin “Zahir Pajaziti”, ku edhe i ka blerë bashkë me djalin e tij biletat për miqësoren dhe ndeshjen e parë ndërkombëtare të Kosovës, kundër Haitit. Ndryshe, interesimi për ta shikuar këtë ndeshje, e cila zhvillohet me 5 mars në Mitrovicë, është jashtëzakonisht i madh. Sipas Agron Selimit, menaxheri i kompanisë AT&Event, e cila e ka organizuar këtë ndeshje, janë shitur të gjitha biletat që kanë qenë në treg. “ Të gjitha biletat që i kemi paraparë të shiten, janë shitur përfundimisht të dielën në ora 15:30. Në Prishtinë janë shitur në ora 14:00 të gjitha. Do të ishim të kënaqur nëse stadiumi do të zinte 50 mijë ose 100 mijë njerëz, pasi interesimi është shumë i madh për këtë ndeshje”, ka deklaruar Selimi. Biletat janë shitur në shtatë qendra të Kosovës: Prishtinë, Pejë, Mitrovicë, Gjilan, Prizren, Ferizaj dhe Gjakovë. Në treg kanë dalë 15 mijë bileta.

Shiten në të zezën, tri herë më shtrenjtë

Biletat e ndeshjes Kosovë – Haiti, janë blerë në mënyrë të organizuar edhe për përfitime. Në shumë qytete, pas shitjes së biletave, çmimet kanë shkuar nga 30 deri në 50 euro. Një qytetar në qytetin e Mitrovicës tregon se si janë duke shkuar çmimet. “Biletat si kanë dalë në shitje, janë shitur shumë shpejtë. Tashmë në tregun e zi biletat shiten me çmim tri herë më të lartë. Është normale që njerëzit e bëjnë për shkak se kushtet ekonomike janë të vështira dhe të njëjtit dëshirojnë të përfitojnë nga kjo mundësi.”, tha një nga qytetarët e Mitrovicës. Interesimi për ta parë Kosovën mund të rritet edhe më shumë, ndërsa çmimet për ata që kanë para, mund të shkojnë deri në 100 euro në ditën e fundit.

Selimi: Nuk mund ta ndalim tregun e zi

Sa u përket biletave që shitën në tregun e zi, Agron Selimi thotë që ekziston në të gjithë botën, por organizatorët kanë kërkuar letërnjoftim për ata që kanë blerë mbi pesë bileta. “Ne kemi kërkuar letërnjoftim për ata që kanë blerë mbi pesë bileta. Ne nuk mund ta ndalim tregun e zi, pasi që gjithkund ekziston, por ata që shesin në të zezën duhet ta dinë që dënimi është nga 2 muaj deri në 3 vjet. Policia vetëm sa ke filluar të hetojë disa ‘facebook’ që kanë lajmëruar për shitjen e biletave me çmim më të lartë”, tha Selimi për gazetën. Ndryshe, organizatori thotë se gjithçka është duke shkuar shumë mirë dhe rezultatin do ta shohim pasi të përfundoj ndeshja. /SportPlus/Telegrafi/