Shërohet 85-vjeçarja nga Prilepi, mjekët ia plotësojnë dëshirën për fotografi të përbashkët

Në Departamentin Infektiv në Prilep është shëruar pacientja më e moshuar e cila ishte infektuar me coronavirus.

85-vjeçarja Elena Makalloska është dërguar për kurim shtëpiak pas 21 ditëve qëndrim në spital, përcjell Telegrafi Maqedoni.

Edhe pse me gjendje klinike të rëndë dhe pneumoni masive, mjekja Mirjana Krsteska (infektologe në spitalin e Prilepit), për “A1on” thonë se me dy terapi, por edhe me ndihmën e vajzës së 85-vjeçares, pacientja ka arritur ta mposhtë virusin. Por, sipas mjekes, kyçe ka qenë këmbëngulja.

“E kurojmë 21 ditë, ndërsa u pranua me gjendje të vështirë. Kyçe ka qenë këmbëngulja. Ne kemi qenë pozitiv, pasi edhe ajo ishte ashtu. Në asnjë moment nuk është dorëzuar. Ajo tha: nëse mbijetoj, dua të fotografohemi dhe ta postojmë në Facebook. Ia plotësuam dëshirën. 85-vjeçarja është lëshuar për kurim shtëpiak, ndërsa në pesë ditët e ardhshme do të jetë me terapi antibiotike. Dy testet e fundit për Covid-19 të saj kanë qenë negativ”, tha mjekja Krsteska.

Personeli mjekësor thekson se edhe vajza e 85-vjeçares ka pasur rol të rëndësishëm në kurimin e saj.

Vajza e 85-vjeçares gjithashtu ka qenë e infektuar, por ndër të parat që është shëruar. Ajo vendosi që të qëndrojë krah nënës së saj gjatë kohës së kurimit./Telegrafi/