Selimi: Po të isha në Kosovë, sigurt do të merrja pjesë në tubimin e Kurtit

Gjatë ditës së djeshme, Albin Kurti shpalli kandidaturën për kryetar të Vetëvendosjes, e njëkohësisht shpalosi edhe programin e tij për këtë pozitë.

Gjatë hapjes së fushatës, ndonëse Lëvizja Vetëvendosje numëron gjithsej 32 deputet dhe shumë anëtarë të tjerë të Kryesisë, aty të pranishëm ishin vetëm disa prej tyre.

Në mesin e atyre që munguan ishte edhe deputeti Rexhep Selimi, i cili deri më tani nuk ka dhënë ndonjë qëndrim nëse do të rrijë apo të largohet nga VV-ja.

Në një prononcim për Indeksonline, Selimi ka treguar arsyet pse nuk ka qenë i pranishëm në tubimin e djeshëm.

Ai ka treguar se ka qenë për vikend me familje në Shqipëri.

“Kam qenë jashtë shtetit. Dje kam qenë në Korçë, ndërsa sot jam në Maqedoni, duke u kthyer në Kosovë. Po të isha në Kosovë, sigurt do të merrja pjesë”, ka thënë shkurt Selimi.

Kujtojmë se ditët e fundit nga Lëvizja Vetëvendosje janë larguar një numër i madh i figurave, duke përfshirë këtu edhe deputetë.

Ndërkaq, zgjedhjet për të parin e VV-së do të mbahen të dielën e ardhshme, me 21 janar.