Rusia humbi 20,000 trupa në vetëm një muaj, thotë Ukraina

Më shumë se 20,000 trupa ruse janë vrarë në luftën në Ukrainë gjatë muajit të fundit, sipas shifrave të publikuara nga Kievi.

Edhe pse nuk janë verifikuar, shifrat mund të nënkuptojnë një tendencë të humbjeve gjithnjë në rritje nga forcat e Moskës, shkruan Newsweek, përcjell Telegrafi.

Në një përditësim të shtunën, Shtabi i Përgjithshëm i Forcave të Armatosura të Ukrainës tha se gjatë 24 orëve të mëparshme, 860 trupa ruse ishin “likuiduar”, duke e çuar numrin total të humbjeve që nga fillimi i agresionit më 24 shkurt në 120,160.

Ndryshe, më 21 dhjetor, Shtabi i Përgjithshëm i Ukrainës tha se numri i të vdekurve rusë kishte tejkaluar 100,000 dhe llogariti se forcat e Moskës kishin humbur mesatarisht rreth 10,000 trupa çdo muaj.

Shifrat e fundit pasojnë shifrat e lëshuara nga Ukraina më 7 janar, të cilat tregojnë për një rritje të madhe të humbjeve, me rreth 10,000 trupa ruse të vrarë brenda dy javëve midis 21 dhjetorit dhe 5 janarit.

Përditësimi i së shtunës tha gjithashtu se Rusia kishte humbur gjithsej 3,140 tanke, 6,256 automjete të blinduara luftarake dhe 2,135 sisteme artilerie.

Newsweek ka kontaktuar ministrinë ruse të mbrojtjes në lidhje me shifrat, të cilat Ukraina i përshkruan si “të përafërta” dhe që janë më të larta se vlerësimet e tjera perëndimore.

Rusia nuk nxjerr shpesh shifra, pasi vetëm deri më tani ka konfirmuar vdekjen e 5,937 trupave ruse.

Ndërkohë, Shërbimi Federal i Inteligjencës (BND) i Gjermanisë ka shprehur shqetësime për humbjet e larta të Ukrainës në betejën e ashpër për qytetin Bakhmut në rajonin e Donjeckut, sipas Der Speigel.

Megjithëse BND tha se humbjet ruse ishin të larta, ushtria ukrainase aktualisht po humbet një numër “treshifror” të ushtarëve çdo ditë në betejat rreth qytetit, raportoi mediumi gjerman.

Të premten, kryetari i shefave të përbashkët të shtabit të SHBA-së, Gjeneral Mark Milley, u tha gazetarëve në bazën ajrore Ramstein në Gjermani se “ndërsa numri i viktimave të luftës është gjithmonë i dyshimtë”, numri i Rusisë ishte “në mënyrë domethënëse mbi 100,000” – edhe pse ai nuk e zbërtheu këtë në ata që ishin vrarë dhe plagosur.

Ai foli pasi aleatët e Ukrainës kishin diskutuar për ndihmën ushtarake për Kievin. /Telegrafi/