Rritja e numrit të rasteve me coronavirus, Qeveria gjatë kësaj jave publikon masat e reja

Pas rritjes së numrit të rasteve me coronavirus, Qeveria e Kosovës gjatë kësaj jave do të dalë me masa shtesë me qëllim të parandalimit të përhapjes së mëtejme të pandemisë, ndërsa Telegrafi merr vesh se në sheshe nuk do të lejohet grumbullimi i mbi pesë personave.

Ministri i Shëndetësisë, Armend Zemaj një ditë më parë ka thënë se masat shtesë do të publikohen gjatë kësaj jave, ndërsa ka pasur edhe një takim virtual me kryetarët e komunave të Kosovës në mënyrë që të shikohen mundësitë e menaxhimit më të mirë të situatës.

Masat e reja që pritet të jenë në funksion nga 30 korriku përfshijnë orarin e punës së lokaleve, lëvizjen, grumbullimin e njerëzve etj.

Lexo po ashtu Bilanci i COVID-19: 3,201 raste aktive, 4,027 të shëruar dhe 185 viktima

Njëra nga to është vendosja për hapjen e kopshteve, dhe orari pritet të zgjatet në gastronomi nga 21:00 sa ishte deri më tani e deri në ora 22:30.

Telegrafi merr vesh se po ashtu se në sheshe nuk do të lejohet grumbullimi mbi pesë persona.  Siç është bërë e ditur pritet të jenë rreth 25 masa, ndërsa nga masat e reja do të preken edhe ata që vijnë nga jashtë, ku iu rekomandohet që të vet-izolohen për 7 ditë.

Edhe Bashkësia Islame e Kosovës, shkaku i situatës me pandeminë COVID-19, ka marrë disa vendime lidhur me festën e Kurban Bajramit.

BIK-u, ka marrë vendim që namazi i sabahut nuk do të falet në xhami në ditën e Kurban Bajramit, falja e namazit të Kurban Bajramit do të bëhet në orën 06:03 min, Xhemati do të prezantojë në xhami 10 minuta para faljes së namazit të Kurban-Bajramit etj.

BIK po ashtu ka njoftuar se për hir të ruajtjes së shëndetit, që në këtë rast është parësor, të mos ketë vizita te njëri-tjetri ditëve të Kurban-Bajramit. /Telegrafi/