Refugjatët sirianë nisin të depërtojnë në Shqipëri

Policia e Fierit tha se bllokoi 9 shtetas nga Siria në segmentin e rrugës kombëtare Tepelenë – Fier. Sipas burimeve zyrtare, refugjatët u bllokuan tek udhëtonin me një automjet luksoz “BMW X 5”, për t’i shpëtuar kontrollit policor. Policia tha se vuri në pranga drejtuesin e automjetit, një shtetas nga Tirana, i cili po realizonte transportin e refugjatëve kundrejt një shume të konsiderueshme të hollash.

Polica shqiptare po heton nëse bëhet fjalë për ndonjë rrjet të mirëorganizuar të transportit të refugjatëve. Burimet policore greke njoftuan edhe për riatdhesimin e 2 refugjatëve të tjerë sirianë nga kufiri shqiptar i Kakavijës. Disa mijëra refugjatë sirianë ,të shpërngulur nga zonat e luftës, ndodhen të strehuar në kampe në zona të ndryshme të Greqisë. Katër prej kampeve janë në Veri të Greqisë, në zonat kufitare afër Shqipërisë.

Më parë refugjatët e vendosur në këto kampe kishin deklaruar për gazetarët shqiptarë se nuk donin të udhëtonin drejt Shqipërisë. Por së fundi, rrjete të trafikut të qënieve njerëzore kanë nisur të veprojnë në organizimin e udhëtimit të tyre duke e parë Shqipërinë si një zonë tranzit për t’i kaluar më pas refugjatët drejt Malit të Zi apo Italisë.

Pak ditë më parë polica greke goditi një rrjet të tillë që synonte të transportonte me autobuzë drejt Shqipërisë rreth 80 refugjatë. Rrjeti, sipas policsë greke, përbëhej nga shtetas shqiptarë dhe shtetas grekë.