Trump reagon pas vendimit të gjykatës rreth rastit me Daniels

Presidenti i zgjedhur amerikan, Donald Trump ka reaguar pas verdiktit gjyqësor rreth blerjes së heshtjes të aktores së filmave pornografik, Stormy Daniels.

Trump nuk do të shkojë në burg ose nuk do të paguajë gjobë pasi është dënuar për pagesa sekrete ndaj yllit të filmave për të rritur, ka vendosur një gjykatës, por vendimi i fajësisë do të mbetet në rekordin e tij.

“Demokratët radikalë kanë humbur një tjetër gjueti shtrigash të mjerueshme dhe joamerikane”, shkroi ai rrjetin social Truth Social.

Trump argumentoi se “nuk kishte kurrë një çështje”.

“Juria e vërtetë, Populli Amerikan, ka folur, duke më rizgjedhur me një mandat dërrmues në një nga zgjedhjet më të rëndësishme në histori. Siç e ka parë populli amerikan, kjo ‘çështje’ nuk kishte krim, as dëme, as prova, as fakte, as ligj, vetëm një gjyqtar shumë i anshëm, një dëshmitar kryesor që është i përjashtuar nga profesioni, i turpëruar, gënjeshtar i përsëritur dhe një ndërhyrje kriminale në zgjedhje”, tha 78-vjeçari.

“Ngjarja e sotme ishte një farsë e neveritshme dhe, tani që ka përfunduar, ne do ta apelojmë këtë mashtrim, i cili nuk ka asnjë bazë, dhe do të rivendosim besimin e amerikanëve në sistemin tonë të dikurshëm të madh të drejtësisë”, shtoi ai.

Ndryshe, gjykatësi në Manhatan, Juan M. Merchan, ka mundur që ta dënojë republikanin 78-vjeçar deri me 4 vjet burgim. Por, ai zgjodhi që të mos shqiptonte asnjë ndëshkim ndaj presidentit të zgjedhur të SHBA-së.

Lexo po ashtu Trump mbetet fajtor, por nuk do të vuajë asnjë dënim në rastin me Stormy Daniels

Trumpi u shpall fajtor në maj të vitit të kaluar nga një gjykatë në Nju Jork për të gjitha 34 akuzat me të cilat përballej për falsifikimin e regjistrave biznesore të kompanisë, duke u bërë presidenti apo ish-presidenti i parë amerikan që dënohej për një vepër penale.

Trumpi ishte shpallur fajtor për falsifikimin e regjistrave biznesore për të ndikuar jashtëligjshëm në zgjedhjet presidenciale të vitit 2016, përmes pagesave për heshtjen e një aktoreje të pornografisë, e cila tha se kishte kryer marrëdhënie seksuale me të.

Ai ngarkohej me 34 akuza penale, përfshirë për falsifikimin e 11 faturave, 12 kuponëve dhe 11 çeqe, për ta fshehur pagesën në vlerë prej 130.000 dollarëve që ia kishte bërë Stormy Danielsit për ta blerë heshtjen e saj në lidhje me pretendimet e saj se kishte kryer marrëdhënie seksuale me Trumpin më 2006. /Telegrafi/