Rasti i studenteve britanike që raportuan për ‘shpime’ pas daljes në klube nate – sa janë gjasat të injektoheni me gjilpërë pa e vënë re?

Raportimet e kohëve të fundit të vajzave që kanë treguar për “shpime” me injeksion gjatë daljes së tyre në zona për argëtim, kanë shkaktuar shqetësim tek studentët dhe politikanët.

Sipas BBC, përcjell Telegrafi, disa forca policore në Mbretërinë e Bashkuar kanë filluar hetimet për rastet e mundshme.

Ekspertët thonë se nuk ka gjasa të ndodh në një shkallë të gjerë, dhe se vendosja e substancave në pije është një çështje më urgjente.

Mirëpo, sa janë gjasat të injektohet dikush me drogë pa dijeninë  e tij? 

Prof Adam Winstock nga Global Drugs Survey thotë se do të ishte e vështirë të injektosh dikë me drogë në ndonjë dalje natën.

“Gjilpërat duhet të futen me një nivel kujdesi – dhe kjo është kur pacienti është ulur para jush me lëkurë dhe pa rroba”, thotë ai për Newsbeat.

Lexo po ashtu Studentja britanike mbeti e 'paralizuar' në shkallët e shtëpisë, pasi i kishin vendosur diçka në pije në një klube nate - çfarë po ndodh në Britani?

“Ideja që këto gjëra mund të jepen rastësisht përmes rrobave në një klub nuk është aq e mundshme”, ka deklaruar ai.

Winstock, i cili është një konsulent psikiatër i trajnuar, thotë se gjithashtu do të ishte e “vështirë” të mbash një gjilpërë në lëkurën e dikujt aq gjatë sa të futet e gjithë substanca.

“Normalisht do të duhej të injektohen disa mililitra, që është gjysmë luge çaji plot me drogë – te dikush. Kjo dhemb dhe njerëzit e vënë re”, potencon eksperti.

Ai thotë se alkooli është më shumë “droga më e përdorur në pije”, kur njerëzit vendosin alkool shtesë – ose më të fortë – në pijen e dikujt.

Por disa profesionistë mjekësorë thonë se mund të jetë e mundur t’i injektohet dikujt drogë pa e vënë re.

Disa gjilpëra janë aq të holla sa që “mezi mund t’i jeni (ato) duke penetruar brenda”, thotë Shirin Lakhani, një mjeke kozmetike e specializuar për shëndetin e grave.

“(Dhe) nëse dikush ka pirë diçka apo më shumë, ai mund të jetë më pak i prirur të ndjejë gërvishtjen e një gjilpëre”, thotë ajo.

Lakhani e cila ka punuar më parë si mjeke e përgjithshme dhe anesteziste – thekson se njerëzit pa ekspertizë mjekësore mund të mësojnë të injektojnë, për shembull, diabetikët injektojnë insulinën e tyre.

“Nëse dikush ka qasje në gjilpëra dhe shiringa dhe mund të futet në një klub, unë nuk e kuptoj pse ata nuk do të jenë në gjendje të ndikojnë ose dëmtojnë dikë në atë mënyrë”, shton Dr Veena Babu, një mjeke e përgjithshme në Londër.

Babu thotë se e kupton se opinioni mund të jetë i ndarë për sa i përket mundësisë, por “nëse ka gra që raportojnë se kjo ka ndodhur, ose kanë ndier trullosje dhe janë rrëzuar dhe kanë vënë re shenja mavijosjeje, ne duhet të respektojmë atë që ata thonë”.

Ajo shton se injeksionet nën lëkurë në kofshë ose në pjesën e sipërme të krahut mund të jenë më të vështira për t’u ndjerë dhe efektet marrin kohë derisa të shfaqen. /Telegrafi/