Botë Ballkan

Qytetarët e Serbisë në “zonë të kuqe”, nuk do të lejohen të futen në Mal të Zi

Para 5 vitesh

Qytetarët e Serbisë nuk do të lejohen të futen përmes kufirit me Malin e Zi, derisa autoritet e Malit të Zi të kenë më të qartë se çfarë ka ndodhur, përkatësisht të kenë të dhëna për pasojat e mundshme shëndetësore sa i përket coronavirusit të një ngjarje të fundit në Beograd.

Kështu është bërë e ditur përmes një njoftimi të Qeverisë së Malit të Zi, përcjell Telegrafi.

Sipas njoftimit, bëhet fjalë për një ngjarje në të cilën u lejua prania e dhjetëra mijëra spektatorëve, të cilët prodhuan rrezik të lartë epidemiologjik.

“Trupi Koordinues Kombëtar analizoi posaçërisht situatën epidemiologjike në Serbi. Fluksi i papenguar i njerëzve dhe mallrave është gjithashtu një politikë strategjike e Malit të Zi, për të cilën vendi ynë është i përkushtuar sinqerisht. Është konstatuar njëzëri se vendimi për të hapur për Serbinë mund të merret vetëm pasi dihet rezultati shëndetësor i ngjarjes së fundit sportive në Beograd, e cila lejoi praninë e dhjetëra mijëra spektatorëve, të cilët prodhuan një rrezik të lartë epidemiologjik”, thuhet në vendimin e autoriteteve në Mal të Zi, përcjell Telegrafi.

Ndryshe, siç është thënë në njoftimin e Qeverisë së këtij vendi, Trupi Koordinues Kombëtar për Sëmundjet Infektive (NCD) i Malit të Zi, sot ka marrë një vendim të cilin e kanë quajtur si “strategjik për hapjen e mëtejshme të Malit të Zi, në përputhje me ruajtjen e politikës të nivelit më të lartë të mbrojtjes së qytetarëve, të huajve që jetojnë në vend dhe turistëve”.

Veç kësaj, vendimi thuhet se ka të bëjë edhe me krijimin e parakushteve për normalizimin e ekonomisë së prekur nga pandemia e coronavirusit.

Në këtë drejtim, përcjell Telegrafi, me propozimin e Institutit të Shëndetit Publik, thuhet në njoftimin e Qeverisë së Malit të Zi, u miratuan një sërë kriteresh për të rritur disponueshmërinë e Malit të Zi, për të hapur kufijtë dhe për të bërë të mundur trafikun ndërkombëtar pa pengesa me masa për të parandaluar përhapjen e coronavirusit.

Siç thuhet më tej, qasja e re bazohet në parimin e mosdiskriminimit, fleksibilitetit dhe qasjes së përbashkët dhe të koordinuar, duke shtuar se Mali i Zi, po zbaton masa në komunikimin dhe shkëmbimin e të dhënave epidemiologjike me vendet e Bashkimit Evropian dhe vendet e tjera kandidate.

Andaj, në përputhje me parimet e miratuara, bëhet e ditur se u formuan tri lista të vendeve në varësi të numrit të rasteve aktive dhe të reja të infeksionit të coronavirusit, trendit të numrit të personave të infektuar dhe reagimit të përgjithshëm të një vendi ndaj një pandemie, duke marrë parasysh informacionin në dispozicion për aspekte të tilla si testimi, monitorimi i kontakteve, trajtimi dhe raportimi.

Kështu që, siç bëhet e ditur në vendim, ndër vendet, banorët e të cilëve mund të hyjnë në Mal të Zi pa kufizime janë edhe: Australia, Austria, Bullgaria, Republika Çeke, Danimarka, Finlanda, Greqia, Holanda, Kroacia, Indonezia, Irlanda, Islanda, Timori Lindor, Xhamajka, Japonia, Jordania, Koreja e Jugut, Sudani i Jugut, Kamboxhia, Kameruni, Kina, Qipro, Kuba, Laosi, Letonia, Libani, Libia, Lituania, Luksemburgu, Madagaskari, Hungaria, Malta, Malajzia, Mali, Maroku, Meksika, Gjermania, Norvegjia, Zelanda e Re, Bregu i Fildishtë, Palestina, Papua Guinea e Re, Paraguai, Sllovakia, Ruanda, Senegali, Sllovenia, Somalia, Shri Lanka, Sudani, Zvicra, Taxhikistan, Tajlanda, Togo, Trinidad dhe Tobago, Tunizia, Uganda, Uruguai, Uzbekistani, Venezuela, Vietnami, Zambia dhe Zimbabve.

Megjithatë, nga vendet, banorët e të cilëve mund të hyjnë në Mal të Zi me një rezultat negativ të testit në laboratorët e akredituar SARS-CoV-2, jo më shumë se 48 orë të vjetër janë: Shqipëria, Bosnja dhe Hercegovina, Kosova, Turqia, Izraeli, Polonia, Rumania, Italia dhe Ukraina. /Telegrafi/