Qeveria paguan qiranë për 300 familje të veriut

Anëtarët e Komisionit për përzgjedhjen e përfituesve të qirasë në vlerë prej 100 euro për banorët e veriut të Mitrovicës, kanë publikuar të martën një listë të mundshme me përfituesit e kësaj ndihme për këta banorë, të cilët që dhjetë vjet janë duke jetuar me qira në jug të Mitrovicës si dhe në qytetet tjera të Kosovës.

Drejtori i Drejtorisë së Administratës në Komunën e Mitrovicës, Abdullah Bejtullahu, një nga anëtarët e komisionit për përzgjedhjen e përfituesve të qirasë, tha se për të qenë përfitues kanë aplikuar 432 banorë, ndërsa lista ka dalë me 280 përfitues.

Ai sqaroi se me 360 mijë euro të ndara nga Qeveria e Kosovës do t’u paguhet qiraja 300 familjeve të veriut për një vit, mirëpo në listën e përfituesve të mundshëm janë lënë edhe 20 vende të lira, me qëllim që gjatë periudhës së ankesave të futen në listë ata që dëshmojnë se plotësojnë kriteret për të qenë përfitues.

Poashtu, sipas tij, bashkërisht me qytetarët e veriut, do të shqyrtohen rastet dhe do të shkëmbehen informatat për rastet e mundshme që janë në listë dhe që i kanë shitur pronat në veri, mirëpo që komisioni nuk ka mundur t’i verifikoj. “Nëse verifikohen raste të tilla ato do të përjashtohen nga lista”.

Bejtullahu ftoi banorët e veriut, që të jenë aktivë gjatë kësaj jave dhe t’i ofrojnë dëshmitë për ata që i kanë shitur banesat dhe shtëpitë në veri e që mund të figurojnë në listat e përfituesve të mundshëm të qirasë. “Jemi duke bërë përpjekje që të gjejmë mënyrën më të mirë dhe më efikase për të bërë një përzgjedhje sa më korrekte”, tha ai.

Ai tha se prej kritereve bazë për të qenë përfitues të qirasë kanë qenë që aplikanti të jetë banor i veriut, të mos e ketë shitur pronën, banesën ose shtëpinë, të jetë duke jetuar në jug ose në qytetet tjera të Kosovës me qira, mos të ketë të ardhura më të larta se 300 euro etj.

Ai sqaroi se ata që kanë mbetur të papërfshirë në listë dhe që kanë dëshmi se i plotësojnë kriteret kanë shtatë ditë në dispozicion që të bëjnë ankesat, të cilat do të shqyrtohen nga komisioni pas një jave.

Sipas tij, prej atyre që kanë aplikuar ka shumë banorë që përveç jugut të Mitrovicës jetojnë në Prishtinë, Gjakovë, Vushtrri etj. /Telegrafi/