Putini do të sakrifikonte 20 milionë ushtarë për të fituar luftën dhe për të siguruar mbijetesën politike – paralajmëron diplomati rus në mërgim

Vladimir Putin do të sakrifikonte 20 milionë ushtarë rusë për të fituar luftën me Ukrainën dhe për të siguruar mbijetesën e tij politike, ka thënë një diplomat rus në mërgim.

Boris Bondarev, i cili u largua nga misioni i përhershëm i Rusisë në Kombet e Bashkuara në Gjenevë për shkak të luftës, tha për Sky News se “fati i Putinit ka mbaruar”, përcjell Telegrafi.

Ai ka shtuar: “Mendoj se 20 vitet e tij në pushtet kanë qenë shumë me fat për të”.

“Ai nuk është i zgjuar, ai është thjesht me fat. Tani mendoj se fati i tij ka mbaruar”.

Bondarev, i cili ka punuar në çarmatimin bërthamor, përshkroi nivelin e dëshpërimit të Putinit – duke thënë se ai është i përgatitur të shohë më shumë se një të dhjetën e popullsisë të vrarë në konflikt.

“Pas humbjes së luftës, ai do të duhet t’i shpjegojë elitave dhe popullatës së tij pse është kështu dhe mund të gjejë disa probleme në shpjegimin e kësaj”.

“Dhe pas kësaj mund të ketë opozitë që do të përpiqet ta rrëzojë ose do të përpiqet të pastrojë vartësit e tij për të gjetur disa njerëz që mund të fajësohen për të gjitha këto probleme. Do të ketë një periudhë trazirash të brendshme”, ka parashikuar ai.

“Nuk duhet të keni asnjë dyshim për këtë, ai mund të sakrifikojë 10 ose 20 milionë rusë vetëm për të fituar këtë luftë vetëm për të masakruar të gjithë ukrainasit sepse është çështje parimore. Është çështje mbijetese politike për të”.

“Duhet ta kuptoni se nëse ai e humb luftën, do të jetë fundi për të”.

Vendimi i Putinit për të zgjeruar forcat ruse me 137,000 trupa vitin e ardhshëm ka çuar në akuza se ai po i çon rekrutët e rinj dhe të papërvojë drejt vdekjes.

Bondarev, i cili ndodhet në Gjenevë, tha se ai mori vendimin për t’u dorëzuar kur tanket kaluan kufirin ukrainas në shkurt, por ai nuk mund të largohej deri në maj.

Ai, megjithatë, tha se “nuk mund të punojë më për këtë qeveri, këtë vend” … “duke bërë krime lufte dhe gabime të tmerrshme dhe krime kundër brezave tanë të ardhshëm”.

Ai pranoi se “nuk besonte se presidenti Putin do ta fillonte seriozisht luftën” përpara se të ndodhte. /Telegrafi/