Publikohen rregullat për të cilat Biden dhe Trump kanë rënë dakord për të zhvilluar debatin e parë midis tyre

Me më pak se dy javë deri në debatin e parë presidencial të ciklit zgjedhor të vitit 2024, janë publikuar detaje shtesë mbi parametrat për të cilat është rënë dakord nga fushata Trump dhe Biden.

Debati i cili do të organizohet nga Jake Tapper dhe Dana Bash i CNN në Atlanta më 27 qershor, do të shënojë përballjen e parë të fushatës së vitit 2024 midis presidentit Joe Biden dhe paraardhësit të tij, ish-presidentit Donald Trump.

Të dy kandidatët e kanë pranuar ftesën dhe kanë rënë dakord të pranojnë rregullat dhe formatin e debatit.

Bëhet e ditur se mikrofonat do të mbyllen gjatë gjithë debatit 90 minutësh, përveç kandidatit, radha e të cilit është të flasë, shkruan CNN, përcjell Telegrafi.

Ndërsa nuk do të lejohen rekuizita apo shënime të shkruara paraprakisht në skenë, kandidatëve do t’u jepet një laps, një bllok letre dhe një shishe me ujë.

Disa aspekte të debatit, duke përfshirë mungesën e audiencës në studio, do ta dallojnë nga debatet e mëparshme.

Por, si në të kaluarën, moderatorët “do të përdorin të gjitha mjetet në dispozicion për të zbatuar kohën dhe për të siguruar një diskutim të civilizuar”.

Për të përmbushur kualifikimet e CNN për debatin, kandidatët duhet të plotësojnë kërkesat e përshkruara në Nenin II, Seksioni 1 i Kushtetutës së SHBA-së për të shërbyer si president.

Pjesëmarrësit duhet gjithashtu të paraqesin një deklaratë zyrtare të kandidaturës në Komisionin Federal të Zgjedhjeve. /Telegrafi/