Pse disa njerëz që nuk janë infektuar me COVID-19, tashmë mund të jenë imun ndaj këtij coronavirusi

Sistemet imune të disa njerëzve që nuk kanë qenë të ekspozuara ndaj coronavirusit mund të kenë një familjaritet me patogjenin – ndoshta ndihmojnë për të zvogëluar ashpërsinë e sëmundjes nëse personi infektohet me COVID-19, sugjeron studimi i ri.

Studimi, i botuar në revistën “Nature”, zbuloi se midis një kampioni prej 68 të rriturish të shëndetshëm në Gjermani që nuk janë ekspozuar ndaj coronavirusit, 35 për qind kishin qeliza T në gjakun e tyre që ishin reagues ndaj virusit, raporton CNN.

Qelizat T janë pjesë e sistemit imunitar dhe ndihmojnë në mbrojtjen e trupit nga infeksioni. Reaktiviteti i qelizave T sugjeron që sistemi imunitar mund të ketë pasur përvojë të mëparshme në luftimin e një infeksioni të ngjashëm dhe mund ta shfrytëzojë atë memorie për të ndihmuar në luftimin e një infeksioni të ri.

Pra, si mund të kishte sistemi i tyre imunitar qeliza T reaktive nëse nuk kishin kurrë COVID-19? Ata kishin “ndoshta më parë infeksione me coronaviruse endemike”, – thonë studiuesit nga institucione të ndryshme në Gjermani dhe Mbretëria e Bashkuar. Shfrytëzimi i kësaj memorie të qelizës T nga një infeksion tjetër akoma të ngjashëm për t’iu përgjigjur një infeksioni të ri quhet “reaktivitet kryq”, transmeton Telegrafi.

Studimi i ri përfshinte analizimin e mostrave të gjakut nga 18 pacientë me COVID-19, të moshës 21 deri 81 vjeç, dhe dhurues të shëndetshëm, të moshave 20 deri 64 vjeç, me qendër në Gjermani. Studimi zbuloi se qelizat T reaktive ndaj coronavirusit u zbuluan në 83 për qind të pacientëve me COVID-19.

Gjetjet e studimit sigurisht që kërkojnë më shumë hulumtime, tha Dr. Amesh Adalja, studiues në Qendrën Universitare për Sigurinë Shëndetësore të Johns Hopkinsit, i cili nuk ishte i përfshirë në hulumtimin e ri.

“Bazuar në këtë studim duket se ekziston një pjesë e konsiderueshme e individëve që kanë këtë imunitet ndër-reaktiv të qelizës T nga infeksionet e tjera të coronavirusit që mund të kenë ndikime në mënyrën se si ato krijojnë coronaviruse të reja. Unë mendoj se përmes këtyre qelizave T do të kuptojmë rolin e tyre”, tha Adalja.

“Ne e dimë, për shembull, fëmijët dhe të adoleshentët janë relativisht të kursyer nga pasojat e rënda të kësaj sëmundjeje, dhe mendoj se një hipotezë mund të jetë që qelizat T para-ekzistuese të kenë ekzistuar në sasi më të mëdha te moshat e reja sesa te të rriturit ose të moshuarit”, shtoi ai.

Adalja shtoi se nuk ishte i befasuar kur pa këtë reagim ndër-reaktiv të qelizave T te pjesëmarrësit e studimit, të cilët nuk ishin ekspozuar ndaj coronavirusit të quajtur SARS-CoV-2.

“SARS-CoV-2 është coronavirusi i shtatë njerëzor që është zbuluar, dhe katër prej coronavirusëve njerëzorë janë ato që ne i quajmë coronaviruse të fituara nga komuniteti, dhe së bashku ata katër janë përgjegjës për 25 për qind të ftohjeve tona të zakonshme”, tha Adalja.

Studimi i ri i “Nature” nuk është punimi i vetëm që sugjeron një nivel të caktuar të imunitetit para-ekzistues midis disa njerëzve ndaj coronavirusit të ri. /Telegrafi/