Prokuroria e Përgjithshme kërkon heqjen e imunitetit të zyrtarëve

Prokuroria e Përgjithshme në raportin vjetor për vitin 2010, dërguar në Kuvendin e Shqipërisë, ka përfshirë ndër të tjera, gjashtë sugjerime, tre prej të cilave lidhen direkt me ndryshimin e Kodit të Procedurës Penale për çështje e heqjes së imunitetit, raportoi të mërkurën e përditshmja Shqip.

Sugjerimet e paraqitura nga organi qendror i akuzës i kërkojnë Kuvendit të Shqipërisë që të ndërhyjë në Kod me qëllim pezullimin e afateve të parashkrimit të ndjekjes penale për personat me imunitet sa kohë ata e gëzojnë këtë status.

Gjithashtu, Kuvendit i kërkohet që të kryejë amendimet e nevojshme ligjore me qëllim kufizimin e imuniteteve, për t’i hapur rrugë organit të akuzës që të ushtrojë më me efektivitet ndjekjen penale edhe për këtë kategori personash, posaçërisht për çështjet që lidhen me veprat penale të korrupsionit dhe krimeve në detyrë.

Raporti i Prokurorisë së Përgjithshme ka filluar të diskutohet nëpër komisionet kuvendore, përpara paraqitjes në seancë plenare nga kreu i institucionit, Ina Rama.

Ndërkaq, prokuroria po vijon hetimet në lidhje me dy video-përgjimet e kryera nga ish-ministri i Ekonomisë, Dritan Prifti me kreun e Lëvizjes Socialiste për Integrim Ilir Meta, si dhe me ish-zëvendësministrin e Ekonomisë Agim Rrapaj.

E përditshmja Mapo raportoi të mërkurën se Prifti dhe Meta janë thirrur gjatë javës së kaluar në prokurori për t’iu komunikuar statusi i ri në raport me hetimet që po zhvillohen, pas vendimit të Kuvendit për të hequr imunitetin e të dy deputetëve. Nga ana tjetër, Agim Rrapaj është thirrur në Prokurori gjatë fundjavës së kaluar ku për rreth katër orë ka dhënë sqarime rreth procedurave të ndjekura për HEC-in e Shushicës në Elbasan dhe proceset gjyqësore për këtë çështje.

Burime të besueshme i kanë thënë të përditshmes se Rrapaj ka mohuar të ketë ofruar përqindje apo shifra për të cilat aludohet, në këmbim të dhënies së koncensionit. Rrapaj ka sqaruar të gjithë procesin që kompania e përfaqësuar prej tij ka ndjekur në marrjen e koncensionit, si dhe proceset gjyqësore që e kanë rrëzuar këtë vendim.

Ministria e Ekonomisë është vënë në fokus të një sërë hetimesh nga ana e prokurorisë që kanë të bëjnë me marrëveshje koncensionare kryesisht të HEC-eve, por edhe me tenderin e naftës në kompaninë shtetërore “Albpetrol”. /Telegrafi/