Program për trajnime për IT

Në qendër të Pejës është hapur një tendë për Programi i Ri për Aftësimin e Kuadrove në Teknologji Informative në Kosovë (PRAKTIK), e organizuar nga kompania “LEGO DAY”, një ngjarje unike që nuk është parë më herët në ketë qytet. Gara me LEGO u organizua për të promovuar mënyrën e të menduarit si inxhinier, punën në grupe, dhe idenë që në të gjithë mund të arrijmë çka do që i vëmë vetes si synim.
Në të njëjtën kohë, kjo ishte një mundësi për qytetarët e interesuar të marrin më shumë informata rreth trajnimeve në IT Specializim dhe Programim.

“Me planprogramet tona inovative, ne kemi për qëllim t’ju mësojmë të mendoni si inxhinier”, tha koordinatorja e qendrës Jeta Pajaziti.

Krahas promovimit të PRAKTIK, u organizua loja me LEGO. “Objektet e LEGOs pasqyrojnë profesionin e programimit dhe punës me teknologji”, tha Gazmend Bërlajolli, drejtor i përgjithshëm i ePayTech. “Si në programim, edhe ndërtimi i këtyre objekteve është modular. Copat e vogla bashkohen në copa më të mëdha, e të gjitha së bashku formojnë një objekt që ka një qëllim të caktuar në përditshmëri”.

Ekipet e regjistruara konkurruan për ndërtimin më të shpejtë të objektit LEGO, duke ndjekur udhëzimet e ndara për çdo ekip. Ekipet treguan dedikim dhe talent të vërtetë në ndërtimin e këtyre objekteve në garë për çmimin final – 10 për qind zbritje në një nga dy trajnimet e PRAKTIK, IT Specializim ose Programim. Qytetarët tjerë, kryesisht familjar dhe miq të lojtarëve,inkurajuan ekipet favorite.
Qendra e trajnimeve PRAKTIK hapet më 1 tetor. Regjistrimi veçse ka filluar, e numri i pjesëmarrësve në trajnime është i limituar.

Krahas dy trajnimeve kryesore Programim dhe IT Specializim, PRAKTIK ofron edhe kursin falas për Ndërmarrësi. Oferta vlen vetëm për ata të cilët regjistrohen në njërën nga trajnimet paraprake.
Ofertat promocionale vlejnë deri më 1 tetor. PRAKTIK garanton gjetjen e praktikës për ata të cilët tregojnë sukses në trajnimet e tyre. /Telegrafi/