Procesi mësimor, në shkolla të ndara etnikisht në Maqedoni

Këta maturantë të shkollës së mesme profesionale për elektroteknikë, makineri dhe komunikacion “Vllado Tasevski” po mbrojnë temën e diplomës. Në këtë mënyrë përfundon shkollimi i tyre i mesëm katërvjeçar. Ata mësimin e kanë zhvilluar në një objekt alternativë në lagjen Autokomandë, pasi paralelet mesin në gjuhën shqipe prej dy dekadash tashmë nuk janë pjesë e godinës amë të shkollës në lagjen Aerodrom. Nxënësit ndonëse të kënaqur nga programi mësimor, ankohen për mungesën e kushteve krahasuar me bashkëmoshatarët e tyre maqedonas.

“Unë mendoj që nuk duhet me u nda, sepse paralelet maqedone i kanë kushtet më të mira se te ne. Të gjitha aktivitetet që i bëjmë, i bëjmë me të hollat tona”, theksoi Hajrullah Saliu, maturant.

“Të gjithë kishim pas dëshirë që të jemi sikur shkolla tjetër, sikur në Lisiçe që është, ajo është shkolla jonë kryesore, do të kishim kushte më të mira”, pohoi Anisha Bajrami, maturante.

Profesori Uran Tuda, tha se ndarja e nxënësve në këtë shkollë, vite më parë, ishte e nxitur nga politika gjë që duhet korrigjuar. Pavarësisht kushteve momentale, ai apelon semi-maturantët të regjistrohen në këtë shkollë për shkak se programet mësimore do të sjellin punësim të menjëhershëm pas shkollimit të mesëm. Ndërkohë, për kthimin e paraleleve shqipe në shkollën amë ai shprehet se duhet vullnet nga drejtuesit aktual të shkollës.

“Është mëkat nëse nuk rritet numri i nxënësve këtu ….Unë mendoj se kjo ka qenë një akt i politikës dhe jo dëshirë e nxënësve e cila shpresoj që në të ardhmen duhet të korrigjohet”, theksoi Uran Tuda, profesor i sh.m.q “Vllado Tasevski”

Shkolla në fjalë tashmë 7 muaj ka drejtor të ri. Aleksandar Sibinovski nuk përjashton mundësinë e kthimit të nxënësve në objektin qendror por shton se ka mungesë të hapësirave të lira për shkak të numrit të madh të nxënësve me mësim në gjuhën maqedonase.

“Kemi plane, dëshirojmë të ndërtojmë një pjese me klasa dhe një me zyra të profesorëve. Megjithatë, ajo është një procedurë të cilën nuk mund ta paralajmëroj me ndonjë afat të caktuar e as ta dimë se kur mund të përfundohet”, pohoi Aleksandar Sibinovski, drejtor I sh.m.q “Vllado Tasevski”.

Deri në momentin e rikthimit të paraleleve shqipe në shkollën amë, Sibinovski paralajmëroi përmirësimin e kushteve në shkollën ku mësojnë paralelet shqipe, të krijohen laboratori dhe të njëjtat të pajisen me mjete të nevojshme që nxënësit të mund të realizojnë praktikën e tyre./Alsat/