Përkujtohen dëshmorët e Betejës së Zhegofcit

Me rastin e 13-vjetorit të Betejës së lavdishme të UÇK-së të Zonës Operative të Karadakut, në Zhegoc, është mbajtur manifestimi në të cilin u kujtuan 23 dëshmorët e betejës së UÇK-së në këtë fshat.

Ish-komandanti i Zonës Operative të Karadakut, Ahmet Isufi tha se “po shënohet një betejë e madhe që ka ndodhë në Zonën Operative të Karadakut, të djemve dhe vashave që në moment kur atdheu i thirri për të fituar lirinë, nuk hezituan, por morën armët dhe iu kundërvunë Serbisë”, transmeton Kosovapress.

Ndërsa, kreu i Lëvizjes Vetëvendosje, Albin Kurti ka thënë se brezat e dëshmorëve e inspirojnë njëri-tjetrin dhe e lidhin kombin së brendshmi, për ta forcuar atë ndaj sulmeve të jashtme.

Të pranishmëve me një fjalë rasti iu drejtua edhe kryetari i Organizatës së Veteranëve të Luftës së UÇK-së, dega në Gjilan, Ahmet Daku, i cili tha se ky përvjetor po i gjen të lënduar, “sepse faktori ndërkombëtar nuk po i kryen detyrat e veta si duhet, por po bënë dallime etnike, pasi që kur bëhet fjalë për shqiptarët ngritën aktakuza pa kurrfarë baze, kurse ata që kanë bërë krime ndaj njerizimit nuk arrestohen”.

Gjatë ditës janë vendosur në Gjilan bustet e ripunuar të dëshmorëve Pajazit Ahmeti dhe Alban Ajeti dhe janë bërë homazhe te varrezat e Dëshmorëve në Gjilan.

Manifestimi përfundoi me festivalin e këngëve folklorike ”Jehonat e Zhegofcit”. /Telegrafi/