Për herë të parë në Kosovë, pacientja operohet njëkohësisht në zemër dhe zorrë (Video)

Hyrisha Salihu (75 vjeçe) është pacientja e parë në Kosovë, e cila i është nënshtruar dy ndërhyrjeve kirurgjike në të njëjtën kohë.

Ajo kishte probleme në zemër, mirëpo pas disa kontrolleve ishte diagnostikuar edhe me kancer në zorrën e trashë.

Një operacion i tillë u realizua nga mjekët e Spitalit Amerikan, të cilët thanë se një ndërhyrje e tillë nuk ishte aspak e lehtë, mirëpo e domosdoshme për t’i shpëtuar jetën pacientes, raporton RTV Dukagjini, përcjell Telegrafi.

“Me konsensus kemi arritur që pacienti ta kryej trajtimin kardio-kirurgik por njëkohësisht është arritur të bëhet edhe një operacion mjaft radikal i ashtuquajtur “eksirapcioni i tumorit” me dy ndërhyrje. Pra te pacientja është bërë një ndërhyrje e dyfishtë”, tha kirurgu Sabri Tmava.

“Jemi ulur bashkë dhe kemi vendosur se pacientja do të përfitonte vetëm nëse bëhet ndërhyrje e dyfishtë, sepse nuk kishte kuptim të kryhej njëra e të lihej tjetra, pasi të dyja rrezikonin jetën e pacientes”, shprehet anesteziologu Ismet Jusufi.

E 75 vjeçarja thotë se pas operimit ndihet shumë mirë.

“Mirë kam kaluar shumë. Faleminderit nga të gjithë, motrat, mjekët…”, tha pacientja Hyrisha Salihu.

Ky operacion ka zgjatur 7 orë dhe pacientja pritet që së shpejti të lirohet nga spitali. /RTV Dukagjini/Telegrafi/