Pavilioni i Japonisë merr Luanin e Artë në Venecia

Në Venecia të mërkurën është mbajtur ceremonia e ndarjes së çmimeve për edicionin e 13-të të Bienales së Arkitekturës.

Luanin e Artë për projektin më të mirë nacional e morri Pavilioni i Japonisë me projektin “Architecture. Possible here? Home-for-All” (“Arkitektura. E mundshme këtu? Shtëpi për të gjithë”), një projekt i kuruar nga arkitekti Toyo Ito, i cili eksploron mundësitë e ndërtimit të vendbanimeve për njerëzit të cilët kanë humbur shtëpitë në tërmetin e Japonisë në vitin 2011.

Luanin e Artë për projektin më të mirë për ekspozitën Common Ground e morri Torri David nga Venezuela me projektin Gran Horizonte.

Luanin e Argjendtë për praktikë premtuese në ekspozitën ndërkombëtare Common Ground e morri Yvonne Farrel dhe Shelley McNamara nga Pavilioni i Irlandës.

Juria e përbërë nga Wiel Arets, Kristin Feireiss, Robert A.M Stern, Benedetta Tagliabue dhe Alan Yentob, po ashtu, ndanë katër mirënjohje speciale për këto shtete: Polonisë me projektin “Making the walls quake as if they were dilating with the secret knowledge of powers” të komisionuar nga Katrazyna Krakowiak; SHBA-ve me projektin “Spontaneous Interventions: Design Actions for the Common Good” të komisionuar nga Cathy Lang Ho; Rusisë me projektin “i-city” të komisioniar nga Grigory Revzin.

Ndërkaq, sot (e mërkurë) bienalja e Kosovës u hap edhe për publikun e gjerë. Kosova po merr pjesë për herë të parë në këtë ngjarje prestigjioze me projektin “Punuesi i Filigranit”, të komisionuar nga Bekim Ramku dhe kuruar nga arkitekti Përparim Rama. “Punuesi i Filigranit” me anë të një teli të filigranit bën lidhjen e emocioneve të njerëzve dhe imazheve të ndërtesave nga vendi. Të gjithë vizitorët e pavilionit kanë mundësinë të votojnë dhe të lidhin një emocion opsional me ndërtesën. Projekti ka si qëllim krijimin e një platforme gjithëpërfshirëse në vendimmarrje në lidhje me arkitekturën si dhe projektimin e ideve rreth të ardhmes së arkitekturës në Kosovë. Të gjithë mund të votojnë deri më datën 25 nëntor në ueb faqen kosovoinvenice.org.

Bienalja e Venedikut këtë vit shënon edicionin e 13-të dhe do të jetë e hapur për publik deri në datën 25 nëntor. Ky edicion i Bienales është i kuruar nga David Chipperfield i cili ka zgjedhur temën “Hapësira e përbashkët” (“Common Ground”) për bienalen, duke shtyrë pjesëmarrësit të reflektojë rreth koncepteve të përbashkëta të cilat e formojnë bazën e kulturës së arkitekturës. /Telegrafi/