Partia e ndarjeve

Në prag të Kuvendit të Tetë Zgjedhor, Lidhja Demokratike (LDK) i nënshtrohet rrezikut për t’iu shkëputur grupe apo individë, diçka që ky subjekt politik e ka përjetuar jo pak herë. Me ndarje e akuza për manipulim, është duke u zhvilluar edhe procesi i tashëm zgjedhor.

Në thumb të kritikave ndodhet Isa Mustafa, i cili katër vjet më parë u vu në krye të partisë falë opozitarizmit të fortë kundrejt konkurrentit kryesor të LDK-së, Partisë Demokratike (PDK) të Hashim Thaçit, me të cilën mbërriti partneritet qeverisës disa muaj më herët.

LDK-ja është në proces të brendshëm zgjedhor dhe në shumë degë janë shprehur pakënaqësi për mënyrën se si zgjidhen delegatët. Në shumicën e nëndegëve kanë përfunduar zgjedhjet dhe pas përfundimit të degëve, do të dalin rreth 355 delegatë, të cilët në fund të majit do të votojnë për udhëheqjen e re të partisë.

Pakënaqësitë më të mëdha kanë qenë për Gjakovën. Shumë aktivistë kanë folur për organizim të kuvendeve klandestine dhe për këtë kanë vënë në dijeni autoritetet qendrore të partisë, nga të cilat nuk kanë marrë përgjigje.

Për manipulime është raportuar edhe në një nga bastionet më të mëdha të LDK-së, në Podujevë.

Strukturat që drejtohen nga Agim Veliu, nënkryetar i partisë, anuluan kuvende që rrezikonin të sillnin njerëz të rinj në krye të Degës. Po kështu, edhe në Mitrovicë e Vushtrri janë evidentuar skena të këtilla, duke i përfshirë kërcënimet me jetë.

Me zhurmë është duke u shoqëruar edhe procesi zgjedhor në kryeqytet. Madje, është raportuar për përleshje në kuvendin zgjedhor në “Tophane”, në të cilin planifikohej të merrte pjesë edhe vetë kreu i LDK-së, Mustafa. /Koha Ditore/