Parlamenti mban një minutë heshtje për viktimat e 21 janarit

Parlamenti filloi të enjten një seancë plenare, në të cilën për herë të parë që nga 21 janari, po merr pjesë edhe opozita.

Seanca u hap nga kryetarja e parlamentit Jozefina Topalli, e cila ngushëlloi familjarët e katër viktimave dhe kërkoi hetim të plotë dhe të pavarur për ngjarjet e 21 janarit, ndërsa deputetët mbajtën një minutë heshtje për të katër demonstruesit që humbën jetën.

Kryetari i Grupit parlamentar socialist, Gramoz Ruçi mori fjalën pas kryetares së parlamentit duke thënë se katër viktimat u vranë siç tha ai, nga dora kriminale e pushtetit.

Ruçi theksoi se atyre ua mori jetën qeveria dhe jo Zoti dhe shtoi se “kjo tokë nuk do të gjejë paqe derisa të ndëshkohen” fajtorët e 21 janarit.

Ruçi tha gjithashtu se viktimat u vranë për lirinë dhe akuzoi qeverinë dhe kryeministrin Sali Berisha për korrupsion dhe përpjekje për të mbajtur me çdo kusht pushtetin, duke thënë se ai “vjedh e vret për të mbajtur pushtetin e tij të korruptuar”.

Kryetari i Grupit parlamentar socialist tha se policët dhe gardistët janë viktima të pushtetit dhe uroi shërim të shpejtë për të plagosurit. Ruçi iu drejtua kryeministrit Berisha duke i kujtuar trazirat e vitit 1997, duke thënë se në çdo kohë që ka qenë në pushtet, u ka dhënë shqiptarëve “vetëm trazira dhe vrasje”.

Ruçi përsëriti thirrjen e opozitës që autorët të vihen para drejtësisë. /Telegrafi/