Pacolli thotë se Kosova asnjëherë nuk ka qenë më afër anëtarësimit në INTERPOL

Si rezultat i angazhimit të fuqishëm diplomatik, Republika e Kosovës asnjëherë nuk ka qenë më afër dhe nuk ka gëzuar mbështetje më të gjerë për anëtarësimin në INTERPOL, se sa tash.

Kështu ka thënë zëvendëskryeministri i Parë dhe Ministri i Punëve të Jashtme i Republikës së Kosovës, Behgjet Pacolli, pas dhjetëra takimeve të ndara, që ka zhvilluar dhe po zhvillon në kuadër të punimeve vjetore të Asamblesë së Përgjithshme të Kombeve të Bashkuara.

“Nga dhjetëra takime të ndara, që kam arritur t’i zhvillojë brenda selisë së Kombeve të Bashkuara në New York, nga presidentë shtetesh, kryeministra dhe homologë të mi, po gjenerojmë mirëkuptim dhe mbështetje të fuqishme për anëtarësimin e vendit në INTERPOL. Besoj fuqishëm se Republika e Kosovës asnjëherë nuk ka qenë më afër dhe nuk ka gëzuar mbështetje më të gjerë për anëtarësimin në INTERPOL se sa tash”, ka thënë kryediplomati kosovar Pacolli.

Gjithashtu, siç bëhet e ditur në një njoftim, numri dy i Qeverisë, Pacolli, zhvilloi takime me ministrin e Punëve të Jashtme të Vanuatu-s, Ralph Regenvanu, ministrin e Jashtëm të Tanzanisë, Waziri wa Mambo ya Nje, ministrin e Jashtëm të Somalisë, Ahmed Isse Awad, zëvendësministrin e Jashtëm të Mbretërisë së Tajlandës, Virasakdi Futrakul, ministrin e Punëve të Jashtme të Beninit, Aurélien Agbenonci, ministren e Jashtme të Koresë Jugore, Kang Kyung, dhe homologë të tjerë nga shtete të ndryshme. /Telegrafi/