Osmani: Kemi pritje të mëdha nga BE-ja dhe aktivisht jemi duke u përgatitur për fillimin e negociatave

Ministri i Punëve të Jashtme, Bujar Osmani, realizoi video takim me Miroslav Lajçak, Përfaqësues Special i BE-së për Ballkanin Perëndimor dhe dialogun Beograd-Prishtinë.

Me këtë rast, ministri Osmani theksoi se Republika e Maqedonisë së Veriut e vlerëson lart rolin të cilin nga ana e BE-së iu është caktuar Ambasadorit Lajçak si ndërmjetës në bisedimet ndërmjet Serbisë dhe Kosovës, si dhe për çështje të tjera në rajon.

“Si fqinjë të parë të Kosovës dhe Serbisë, kemi interes të veçantë për suksesin e dialogut Prishtinë-Beograd të ndërmjetësuar nga BE-ja. Afrimi i qëndrimeve të të dy palëve dhe normalizimi i marrëdhënieve midis dy vendeve do të paraqesë investim të madh në stabilizimin dhe evropianizimin e të gjithë rajonit”, tha Osmani.

Bashkëbiseduesit diskutuan edhe për perspektivën evropiane të Maqedonisë së Veriut, për marrëdhëniet e fqinjësisë së mirë, iniciativat rajonale si dhe pritjet gjatë periudhës së ardhshme.

“Kisha vizitë jashtëzakonisht të suksesshme në Bruksel, duke u takuar me Përfaqësuesin e Lartë të BE-së, Borrell dhe Komisionerin e Zgjerimit të BE-së, Varhelyi. Jemi në pritje të Raportit vjetor nga ana e Komisionit, si dhe të planit ekonomik për Ballkanin Perëndimor të cilën e njoftoi Eruokomisioneri Varhelyi. Në vend jemi të përqendruar në reformat, me theks në sundimin e ligjit, si dhe në finalizimin e të gjitha përgatitjeve politike dhe administrativo-teknike për fillimin e negociatave deri në fund të vitit”, tha Osmani, duke shprehur besim në Përfaqësuesin Special Lajçak se vendi do të jetë gati për të mbajtur Konferencën e parë Ndërqeveritare dhe fillimin e negociatave me BE-në.

Bashkëbiseduesit ranë dakord se mbajtja e konferencës së parë ndërqeveritare ndërmjet Maqedonisë së Veriut dhe BE-së deri në fund të vitit është e rëndësishme jo vetëm për Maqedoninë e Veriut, por edhe për porosinë që do të dërgohet në të gjithë rajonin.