Osmani konfirmon përzierjen e spiunëve rus në kontestin Maqedoni-Bullgari

Ministri i Punëve të Jashtme, Bujar Osmani në brifingun e sotëm me gazetarët theksoi se njerëz të punësuar në institucione të Maqedonisë së Veriut janë lajmëruar tek autoritetet bullgare dhe kanë shpërndare skepticizëm në lidhje me gjetjen e zgjidhjes për kontestin Shkup-Sofje.

“Ja do të merr një shembull konkret. Këtë javë janë lajmëruar nga Maqedonia e Veriut në Republikën e Bullgarisë duke thënë se është i panevojshëm i gjithë ky angazhim sepse këtu shumë shpejt do të shkohet në zgjedhje…se do të ketë të parakohshme, se nuk do të mund të gjendet zgjidhje konkrete”, deklaroi Osmani.

Osmani gjithashtu konfirmoi deklaratat e Petkovit, i cili së fundmi deklaroi se shërbime pro ruse kanë punuar për prishjen e marrëdhënieve Shkup-Sofje.

“Nga këtu them se ky konstatim është i saktë. Se ka pasur vazhdimisht tentime që Ballkani Perëndimorë të mos lëvizë me dinamikën adekuate drejt BE-së”, tha Osmani.

Osmani tha se gjatë gjithë kohës kanë tentuar të thonë të njëjtën, gjegjësisht se perspektiva evropiane e rajonit i pengon palëve të treta.

“Unë jam i kënaqur që po dëshmohet edhe me fakte dhe këtë posaçërisht e thonë miqtë tanë bullgarë që interes në bllokimin e perspektivës evropiane nuk ka asnjë anëtare e BE-së, por vetëm palët e treta që dëshirojnë që BE të dobësohet, për shkak se ka një rajon me çështje të hapura pa perspektiva të qarta. Ne gjatë gjithë kohës e thamë këtë, që në interes strategjik i Bullgarisë është të jetë lider i perspektivës evropiane në rajon dhe rajoni të konsolidohet në drejtim të anëtarësimit në BE. Për shkak se zgjerimi mbi gjitha është çështje sigurie. Bullgaria gjendet në këtë rajon tonin, siguria nuk mbaron në kufijtë e një shteti”, deklaroi Osmani.

Lexo po ashtu Petkov: Agjentët rus kanë punuar kundër marrëdhënieve dhe bashkëpunimit të Bullgarisë dhe Maqedonisë së Veriut